Қарағанды облысында ХХ жазғы еңбек маусымында 4800-ге жуық жас жұмыспен қамтылады — бұл республика бойынша ең үлкен көрсеткіш. Өткен жылмен салыстырғанда олардың саны 1820 адамға артты. «Жасыл ел» жастар жасағын 100 % имидждік формамен қамтамасыз ету жоспарланып отыр.
— Жоба бюджетінің негізгі үлесі фирмалық жабдықты тігуге тиесілі. Жинаққа қалпақ, футболка, куртка (бомбер) жəне шалбар кіреді. Биыл арнайы киімнің бір бөлігін дайындау үшін біз Қарағанды технология жəне сервис колледжімен келісімшартқа қол қойдық. Бір жағынан, біз жастарды имидждік формамен қамтамасыз етеміз, ал екінші жағынан — жергілікті өндірушілерді қолдаймыз, — дейді жастар саясаты мəселелері басқармасының басшысы Нұржан Ілияш.
Колледж «Жасыл ел» жасақтары үшін имидждік форманы тігуге тапсырысты алғаш рет алып отыр.
Бірақ жергілікті өндірушілер екі жыл бойы жауынгерлерге арналған брендтік жабдықты тігіп келеді.
— Біздің көлем — 500 жиынтық. Бес шеберхана жұмыс істейді, оларда 100-ге жуық адам — студенттер мен өндірістік оқыту шеберлері жұмыс істейді. Жұмыс барысында біз студенттеріміздің дағдылары заманауи талаптарға қаншалықты сəйкес келетінін көре алдық. Болашақта алынған тəжірибе колледжге қосымша қаражат табуға көмектеседі, — деп есептейді Қарағанды технология жəне сервис колледжінің директоры Меруерт Мамырова.
Өндірістік оқыту шебері Гүлнар Жұминаның айтуынша, үлкен көлемге қарамастан, студенттер тапсырманы орындауда. Жұмысқа 1-ден 3-ші курсқа дейінгі оқушылар қатысады. Шеберлер алдымен не жəне қалай тігу керектігін көрсетеді, жұмыс барысында өздері де көмектеседі жəне кеңес береді.
— Бұл біз үшін де, студенттеріміз үшін де үлкен тəжірибе, — деп атап өтті Гүлнар Жұмина
«Жасыл ел» жастар жобасын қаржыландыру көлемі жыл сайын артып келеді. Бұл жалақы деңгейін ұстап тұруға жəне қатысушылардың санын көбейтуге мүмкіндік береді.
Осы еңбек маусымында жауынгерлердің шамамен 10 %-ы мемлекет тарапынан ерекше қолдауды қажет ететін жасөспірімдер. Жобаға 14 жастан бастап қатысуға болады.
Манас АҚСАРЫ