Үкімет Қарағанды агломерациясын дамыту жоспарын бекітті. Кешенді жоспар 2029 жылға дейінгі уақытты қамтиды. Құжат өңірдің әлеуметтік-экономикалық тұрғыда нығайтып, халықтың әл-ауқатын арттыруды көздейді.
Агломерацияның орталығы – Қарағанды. Ал құрамына Саран, Шахтинск, Абай қалалары мен Ақтау, Ақтас, Шахан, Долинка, Новодолинский кенттері, Абай ауданының 5 ауылдық округі, Бұқар жырау ауданының 17 ауылдық округі және Осакаров ауданының 1 ауылдық округі енеді. Агломерацияның жалпы ауданы – 7,7 мың шаршы шақырым. Барлығы 33 елді мекен бар. Бұл елдімекендердің ең алысы Қарағандыдан 30 шақырым алыста жатыр. Халық саны шамамен 870 мың адамды еңсерді.
Қарағанды агломерациясы елдің тура ортасында орналасқан. Сондықтан Орталық Қазақстанның, жалпы Қазақстанның дамуы үшін маңызы зор. Агломерацияны дамыту ірі қалалардағы халық тығыздығын азайтуға. қала мен ауыл арасындағы өмір сүру деңгейін теңестіруге мүмкіндік береді.
Агломерация аумағында жаңа жұмыс орындарын құруға айрықша көңіл бөлініп отыр. Мәселен, таяу бес жылда жаңа өндіріс ошақтары ашылуға тиіс. соның нәтижесінде 17 мыңнан астам адам тұрақты жұмыс орнымен қамтылмақ.
Алдын ала болжам бойынша өнеркәсіп өндірісінің көлемі 2,5 трлн теңгеге дейін өседі. Оның ішінде өңдеу өнеркәсібінің үлесі 71 пайызға дейін ұлғаяды. Соның арқасында шағын және орта бизнес өркендеп, салада еңбекпен қамтылғандар үлесі де артады.
Елдімекендерде жайлы тұрмыс ортасын құруға арнайы жоспар түзілген. Мәселен, биыл Саранда тұрғын үй-коммуналдық шаруашылығын жаңғырту жұмыстары жалғасады. Бүгінде қала қарқынмен дамып келеді. Шаһардағы өндірістік нысандарға салынған инвестиция нәтижесінде халық саны көбейді. Бұрыннан бос қалған тұрғын үйлер қалпына келтіріліп, жаңа әлеуметтік объектілер ашылды. Соған сәйкес жергілікті инфрақұрылымды жақсарту қолға алынды.
Қала әкімі Дарын Бұлқайырдың айтуынша, былтыр су құбырларының ауқымды бөлігі жаңартылды.
– Жылумен жабдықтау мәселесі ерекше бақылауда. Бүгінгі таңда 113 көппәтерлі үй орталық қазандықтан, тағы 160 үй жергілікті қазандықтардан жылытылады. Биыл орталық жылу жүйесіне 57 үй мен 27 әлеуметтік нысан қосылады. Жұмыстар үйлердің дайындығына және ішкі құбырларға байланысты кезең-кезеңмен жүргізіледі. Қалада су құбыры желілерін қайта жаңарту жалғасады. Өткен жылы 28 шақырым магистральді және 20 шақырым орамішілік желілер салынды. Угольный кентінде жұмыстар аяқталды. Ал басқа аудандарда әлі де жалғасады. Биыл үйлер жаңа желілерге қосылуы тиіс. Бұдан бөлек, көлемі 10 мың текше метр болатын екінші су көтергіште резервуар салынуда. Ол ауыз су қорын құруға және сумен үздіксіз қамтамасыз етуге мүмкіндік береді, – дейді Дарын Бұлқайыр.
РТИ ауданында сумен жабдықтау, су бұру, резервуардың және көтергіш сорғы станциясының магистральдық желілерін салу бойынша жобалық-сметалық құжаттаманы әзірлеу басталды. Сондай-ақ, Саранда электр желілерін жаңғырту жалғаса бермек. Қазіргі уақытта қала балансына 9 фидер мен 52 шақырым иесіз желі берілді. Биыл фидерлерді ауыстыру, кабель қимасын ұлғайту және жарықтандырудың жаңа тіректерін орнату жоспарланған.
Ақтаста да электр желілерін жаңғырту жөніндегі ауқымды жоба аяқталады. Әкімнің айтуынша, бұл жұмыстардың барлығы электр энергиясын жеткізу сапасын жақсартуға тиіс.
Сонымен қатар кәріз желілері де назардан тыс қалған жоқ. Әзірге 35,5 шақырым кәріз желісінде қайта жаңғырту жоспарланған. Бұл жұмыстар үш кезең бойынша жүргізілмек.
Елдімекендерді абаттандыруға ерекше назар аударылмақ. Биыл Қарағандының кіреберіс қақпасына көгал төселіп, жаяу жүргіншілердің мобильдік картасы жасалады. Бұл қала қонақтары мен тұрғындарының серуендеуіне ыңғайлы болады дейді қала әкімдігінде.
Қалаға кіреберіс Алматы тас жолындағы аркадан бастап, православ шіркеуіне дейін көгал егіледі. Жол бойында екі қатарға 2 800 жуық ағаш егу жоспары бар. ҚЖақын уақытта сарапшылар топырақтың өсімдік егуге жарамдылығы туралы қорытынды беруге тиіс. Бұдан бөлек, Үлкен Михайловка станциясындағы мектеп жанындағы ескі саябақтағы ағаштарды кесіп, орнына шыбық отырғызылады.
Биыл Қазыбек би ауданындағы үш маңызды нысанда абаттандыру жұмыстары аяқталады. Мәселен, К.Станиславский атындағы орыс драма театрының алдындағы алаңдағы тірек қабырғасын қайта тұрғызып, ыңғайлы баспалдақ жасап, аялдамаларды алаңның шетіне ауыстыру арқылы ашық кеңістік жасалады. Тарихи көрінісі бар орындықтар, қоқыс салатын жәшіктер мен шамдар орнатылып, ағаш егіледі.
Сондай-ақ, Сарыарқа көшесіндегі жаңа саябақтағы жаңғырту жұмыстары аяқталады.
Бұқар жырау даңғылын абаттандыру жобасы – қаладағы ең маңызды жоба болып отыр. Бұл жерде жаяу адамның жүруі үшін ыңғайлы жағдай жасау көзделіп отыр. Сонымен қатар бірінші кезекте Шахтерлер даңғылындағы гүлбақты («БУМ» сауда үйінен № 3 емханаға дейін), сондай-ақ «Норма» дүкенінің жанындағы Бөкетов гүлбағын абаттандыру бойынша жоспар жасалды. Жоба аясында тротуарлар жаңартылып, жарық шамдары қойылады.
Манас АҚСАРЫ