Аймағымызда ауылшаруашылығында 36,4 млрд теңгеге 24 инвестициялық жобасы жүзеге асырылуда. Бұл қаражат мал шаруашылығы мен өсімдік шаруашылығын дамытуға бағытталған. Биыл өндіріс көлемін 5%-ға арттыру жоспарланған. Аграрийлер суармалы жерлердің ауданын кеңейтіп, асыл тұқымды мал шаруашылығына көңіл бөлуде.
Саланың дамуы туралы толығырақ аппарат кеңесінде айтылды.
– Ауылшаруашылығын дамыту – өңір экономикасын әртараптандырудың негізгі факторларының бірі. Бұл азық-түлік қауіпсіздігін қамтамасыз етуге, ауыл тұрғындарының тұрмысын жақсартуға және жаңа жұмыс орындарын құруға мүмкіндік береді. Осының барлығы өңірдің экономикалық тұрақтылығына оң әсерін тигізеді, – деп атап өтті облыс әкімі Ермағанбет Бөлекпаев.
Ауылшаруашылығы басқармасының басшысы Саят Мусин биыл ауылшаруашылығы дақылдарының алаңы 104,9 мың гектарға ұлғайып, шамамен 1,2 млн гектарды құрайтынын баяндады. Егістік алқаптарын қайта бөлу жүргізілуде: бидай егістігін қысқарту есебінен майлы және жемшөптік дақылдарды өсіру ұлғайтылуда. Сондай-ақ, көбірек картоп пен көкөніс егу жоспарланып отыр.
Қазір егіс науқанына дайындық белсенді жүріп жатыр. Аграршылар тұқым, тыңайтқыш, отын сатып алып, техниканы жөндеуді аяқтауда. Арзандатылған дизель отынын жеткізу басталды.
Басқарма басшысы инвестициялық белсенділік туралы да айтып берді. Жоспарланған жобалардың басым бөлігі өсімдік шаруашылығында – 11, мал шаруашылығында – 6, қайта өңдеу саласында – 7.
Аудан әкімдері ауылшаруашылығындағы жаңа жобалар туралы хабарлады.
Мысалы, Нұра ауданында өсімдік шаруашылығы мен мал шаруашылығын дамытумен қатар балық өсіру бағыты пайда болады. Ахмет ауылында форель шаруашылығы жобасы жүзеге асырылуда.
Бұқар жырау ауданында сүт өнімдерін өндіретін цех, сондай-ақ ет комбинаты бар бордақылау алаңын салу жоспарлануда.
Ауыл халқының табысын арттыру үшін «Ауыл Аманаты» жобасын іске асыру жалғасады. Ақтоғай, Бұқар жырау және Қарқаралы аудандарында пилоттық тәртіпте «Бір ауыл – бір өнім» қағидаты бойынша кооперативтер құру жоспарлануда.
– Біздің облыста ауылшаруашылығын дамытуға барлық мүмкіндік бар. Ең бастысы – өз әлеуетімізді дұрыс және тиімді пайдалану. Осы мақсатта көзделген барлық бағдарлама біздің өңірде толығымен іске асырылуы тиіс, – деп қорытындылады Ермағанбет Бөлекпаев.