Халқымыз үшін Наурыз мейрамы – жылдың басы, күн мен түннің теңелер шағы. Тамырын тереңнен тартқан ежелден бастау алатын мейрам – береке мен бірліктің, тазалықпен татулықтың тұғырын нығайтып, риясыз шаттық пен қуанышқа кенелтер ұлы мереке.
Әбілқас Сағынов атындағы Қарағанды техникалық университетінің «Қазақ тілі және мәдениеті» кафедрасының меңгерушісі ф.ғ.к., доцент Қ.С.Қалыбекова және жауапты оқытушылар п.ғ.м., аға оқытушы Л.М.Күлейменова, п.ғ.м., аға оқытушы М.Т.Оспангалиева, п.ғ.м., оқытушы Н.А.Қоңыровалардың ұйымдастыруымен 20 наурызда 22 Наурыз – Ұлыстың ұлы күні мерекесіне арналған «Ұлттық салт-дәстүр ұрпаққа мұра» тақырыбында Жол-көлік және Инновациялық технологиялар факультетінің 1 және 2 курс студенттері арасында ұлттық дәстүрлерімізді дәріптеу мақсатында мерекелік шара викториналық жарыс өткізілді.
Шараның негізгі мақсаты – студенттердің ұлттық құндылықтар туралы түсініктерін кеңейту. Ұлттық салт-дәстүріміздің тамыры көнеден бастау алатыны туралы кеңінен түсінік беру. Әдеп-ғұрып, дәстүрлеріміз арқылы үлкеннің кішіге, кішінің үлкенге деген сүйіспеншілігін, сыпайылық қарым-қатынасын дамыту. Сондай-ақ, бүгінгі жас ұрпақты әдептілікке, кішіпейілділікке, ізеттілікке тәрбиелеу.
Шара барысында «Ұлттық салт-дәстүр ұрпаққа мұра» тақырыбындағы «Шілдехана», «Бесікке салу», «Тұсау кесу», «Асық ойнау», «Арқан тарту», «Қазақша күрес» т.б. ұлттық әдеп-ғұрып, дәстүрлерге арналған бейне материалдар ұсынылып, ақпараттар негізінде қатысушы студенттер арасында өзара пікір алмасып, өздерінің ойларын ортаға салды. Атадан балаға мирас болып келе жатқан ұлттық дәстүрлеріміздің бүгінгі қоғамдағы жастардың көзқарасымен қарағанда тәрбиелік мәні зор екеніне тоқталды. Бейбітшілік пен келісімі жарасқан қазақ халқының бірлігі мен берекесі ұйысқан шоқтығы биік қара шаңырақтың астында бір отбасының баласындай сыйласып, тату-тәтті өмір сүріп, ұлттық мәдениет, дәстүрлері және тілі мен дінін берік ұстанып, дәріптеуі кейінгі ұрпақтың басты міндеті екенін жетік түсінгендерін көрсете білді.
Жарыс шарттарына сәйкес І кезең «Ұлттық салт-дәстүрлер» тақырыбында ұсынылған ұяшықтарда берілген сөздердің мағынасын ашу тапсырмасы бойынша Сиб-23-2 тобының 2 курс студенттері Болысбай Бүркіт, Жастүлеков Медет, Жанәбіл Айбек, Әбдіқадыр Ерасыл, Бейсенбай Диас, Есенбай Дулат, ТТ-24-1 тобының студенттері Тимурова Дильнара, Ербаева Аяулым, Барсаева Назерке, Сағат Алихан, ОП-24-1 тобының студенті Сыздыков Абылай, ОП-24-1с тобының студенттері Айбеков Арман, Төлеутай Әлішер, Жазыбаев Азамат өздерінің ұшқыр ойларымен салт-дәстүрлер туралы жетік білетіндерін көрсете білді.
ІІ кезең «Мақал-мәтел» айтудан жарыс бойынша белсенділік танытқан қатысушылар қатарында ТТ-24-1, Сиб-23-2, ОП-24-1, ОП-24-1с тобының студенттері «Отан», «Ел», «Достық», «Сыйластық» тақырыбында әзірленген тапсырманы жалғастыруда сыни тұрғыдан ойлау технологиясы бойынша жүргізілген ойындарға белсене қатысып, түсіндіру, әңгімелеу арқылы зеректілік қабілеттерін көрсетті.
Жарысқа қатысқан әр топ студенттері осындай ата-бабаларымыздан қалған құнды жәдігерлер мен шежіре, нақыл сөздерден мысалдар ретінде келтіре отырып, бүгінгі күнге ұрпақтан-ұрпаққа жеткен мол тарихи, мәдени мұраларымыз үшін өздерінің ризашылықтарымен қазақ халқына деген алғыстарын білдірді.
Қорытындылай келе, Ұлыстың ұлы мейрамы Наурыздың шығыс күнтізбесі бойынша «Жаңа жыл», «Жаңа күн» сынды беретін мағынасынан басқа, жақсылықтың жаршысы іспеттес барша адамзат баласына ерекше қуаныш сыйлайтын ұлы мереке екенін әр кез естен шығармау керектігін және мереке қарсаңында қайырымдылық іс, жылы сөз, жақсы ой, кіршіксіз сезімдерді айналамыздағы адамдарғажиі айтып, қуантып жүруді естен шығармағанымыз жөн деген пікірлермен қорытындылады.
Нұргүл ҚОҢЫРОВА,
Лайла КҮЛЕЙМЕНОВА,
Меңдігүл ОСПАНГАЛИЕВА,
Әбілқас Сағынов атындағы
ҚарТУ-дың«Қазақ тілі және мәдениеті»
кафедрасының оқытушылары