Қарқаралы ауданына қарасты Қасым Аманжолов атындағы ауылда Ұлттық дәстүрлер мен мәдениетті дәріптеуге бағытталған «Көш керуен» наурыз шеруі өтті.
Шеру Талды көшесінен бастау алып, Қ.Аманжолов, Жамалиден көшелері және орталық алаңға дейін жалғасты.
Қатысушылар қазақтың ұлттық киімдерін киіп, оның ішінде Талды қорымынан табылған «Алтын Адамды» дәріптеп, халқымыздың рухын асқақтататын «Жеті қазына» көшінде құмай тазы, жылқылар және атарбамен жүріп өтті.
Күміс көмей әншілер ұлттық аспаптармен әуелете ән шырқап, халықтық бай дәстүрі мен мәдениетін дәріптеді. Жол бойында тұрғындар керуенді жылы қарсы алып, мерекелік көңіл-күйге бөленді.
22 наурық күні Талды клуб үйінде наурыз мерекесіне орай «Қош келдің, әз-Наурыз» атты мерекелік шара өтті. Мерекеде әр мекеме дастарқан жайып наурыз көжеден барша халыққа дәм татқызды. Ұлттық ойындар да ойналды. Көш керуен көшелерді айналып әжелеріміз шашуларын шашты. Қыдыр ата бата беріп одан әрі мерекеге жиналған ауыл халқы қаражорға биін биледі.
– Баршаңызды Ұлыстың ұлы күні – Наурыз мерекесімен құттықтаймыз!
Біз бұл жарқын мейрамды асыға күтеміз, себебі Наурыз – тіршілік атаулы жанданып, жер-дүние жаңаратын кезең.
Ұлттық құндылықтарымыз бен рухани мұраларымыз әз-Наурызбен біте қайнасқан. Ақ пейілді халқымыз қашанда Ұлыстың ұлы күнін кең дастарқан жайып, ақ тілекпен қарсы алған.
Бұл күні бұлақ көзін ашып, көршіге көмек көрсетіп, сауапты істермен айналысу игі дәстүрге айналған.
Наурыз – көне заманнан бері ырыс пен ынтымақтың, татулық пен тазалықтың, бірлік пен адамгершіліктің мейрамы болып есептеледі.
Әрбір қазақстандық отбасына зор денсаулық, әрбір үйге бейбітшілік, жақсылық тілейміз, аман-есен болып, еліміз өркендей берсін! – деп ауыл тұрғындарын Қасым Аманжолов ауылдық округінің әкімі Ербол Жоламан құттықтады.
Сонымен қатар, Ұлттық спорт күніне орай Талды ауылында әр түрлі ұлттық ойындар ұйымдастырылды. Қол күрес (ерлер, әйел адамдар және жас өспірімдер) арасында. Садақ ату (ерлер арасында), қазақша күрес, тай жарыс, арқан тартыс көшелер (ерлер және әйел адамдар) арасында өтті.
Әділ БЕК