Жасыл желектерді түгендеуден, қалдықтарды сұрыптау және қайта өңдеу бойынша жаңа жобалардан бастап, ең таза аулаға, экочелленджерге дейін осының барлығы Қарағанды облысы бойынша «Таза Қазақстан» экологиялық мәдениетін дамыту тұжырымдамасын қамтиды. Оны жүзеге асыру бойынша іс-қимыл жоспарын облыстық мәслихат депутаттары кезектен тыс XXV сессияда бекітті.
– Әзірленген тұжырымдамада үш бағыт бар: экологиялық ойлау және мінез-құлық, экологиялық білім беру, экологиялық ағарту. Барлығы 48 шара нақты мерзімдермен және орындаушылармен белгіленген. Жоспарда экологиялық мәдениетті дамытудың түрлі әдісі мен тәсілдерін қамтитын кешенді тәсіл қарастырылған, – деп түсіндірді Табиғи ресурстар және табиғат пайдалануды реттеу басқармасының басшысы Бахтияр Санбаев.
Ол негізгі шараларды атап өтті. Олардың қатарында қалдықтарды сұрыптау және қайта өңдеу бойынша инфрақұрылымдық жобаларды іске асыру, қалалар мен аудандарды, сондай-ақ кәсіпорындар мен ұйымдардың аумақтарын көгалдандыру бар. Жасыл желектерді түгендеу бүкіл өңір бойынша жүргізілуі тиіс. Облыста атмосфералық ауа жағдайының мониторингі бойынша автоматтандырылған бекеттер санын арттыру жоспарлануда. Экологиялық құқық бұзушылықтарды тіркеуге арналған камералар да қосылады.
Жоспар табиғи ресурстарға ұқыпты қарауды, үнемді тұтынуды қалыптастыруға бағытталған ауқымды ағартушылық жұмысты қамтиды.
Облыстық «ЭкоFEST» фестивалі, сондай-ақ жеңімпаздарды көтермелейтін «Үлгілі ауыл», «Таза аула – таза қала/аудан» конкурстары өткізіледі.
Естеріңізге сала кетейік, Мемлекет басшысының тапсырмасымен Үкімет 2024-2029 жылдарға арналған «Таза Қазақстан» экологиялық мәдениетін дамыту тұжырымдамасын бекітті. Қарағанды облысында үкіметтік құжат негізінде өңірлік тұжырымдама мен іс-қимыл жоспары әзірленді.