Өзбекстан Республикасы Науаи облысы, Кенимых ауданында Ұлыстың ұлы күні — әз-Наурыз мейрамы ауқымды аталып өтті. Айтулы шараны Өзбекстан Республикасы «Қазақ аналары — дәстүрге жол» ұйымдастырды.
Көрші мемлекетте қазақ диаспорасының, жалпы қазақ мәдениеті мен әдебиеті, тарихы, салт-дәстүрі жиі насихатталып, ұлықталуда. Оған Өзбекстан Республикасы Қазақ ұлттық мәдени орталығы төрағасының орынбасары, Өзбекстан Республикасы «Қазақ аналары — дәстүрге жол» жетекшісі Клара Садирбаеваның еңбегі зор. Ел тарихын, ұлт мәдениетін ұлықтау жолында түрлі шара ұйымдастырып келеді.
Науаи облысында өткен Наурыз мейрамында ұлттық тағамдар мен салт-дәстүр үлгілері көрсетілді.
— Ұлыстың ұлы күні барша қазақ еліне, түркі жұртына қайырлы болсын. Егеменді еліміздің тыныштығын, бейбітшілігін, ынтымақтығын, байлығын тілеймін, — дейді Өзбекстан Республикасы «Қазақ аналары — дәстүрге жол» төрайымы Клара Садирбаева.
Шара барысында ауылдың алты ауызы орындалып, қазақтың дәстүрлі әндері шырқалды.
Ерболат ЕРБОЛҰЛЫ
