География мен математикадан республикалық олимпиадада, сондай-ақ бастауыш сыныптарға арналған XVIII «Бастау» республикалық математикалық олимпиадада қарағандылық оқушылар жақсы нәтиже көрсетті.
География мен математикадан негізгі олимпиадаға өңірдің 11 оқушысы қатысып, олардың көпшілігі жүлделі орынға ие болды.
География бойынша бірінші орынды №1 «БІЛІМ-ИННОВАЦИЯ» лицей-интернатының 9 сынып оқушысы Нұрия Мұханбетәлі иеленді. География бойынша екінші орында Н.Нұрмақов атындағы мектеп-лицей-интернатының оқушылары Сырым Амантай (9 сынып) және Ералы Қалыш (10 сынып).
Математикадан екінші орынды №2 «БІЛІМ-ИННОВАЦИЯ» лицей-интернатының тоғызыншы сынып оқушысы Мирас Кеңесбек және «Мұрагер» мамандандырылған лицей-интернатының 11 сынып оқушысы Бейбарыс Жеңісбек иеленді. Жеңімпаздардың үштігін №1 «БІЛІМ-ИННОВАЦИЯ» лицей-интернатының 11 сынып оқушысы Жанарыс Теңдіков аяқтайды.
Сондай-ақ, «Бастау» республикалық математикалық олимпиадада да кіші сынып оқушылары табысты өнер көрсетті. Қарағанды облысының намысын қорғауға облыстық тур жеңімпаздарының командасы аттанды. Алты қатысушының бесеуі жүлделі орынға ие болды.
– Тапсырмалар былтырғымен салыстырғанда күрделі болды. Осыған қарамастан, балалар үлкен жұмыс жасап, жақсы нәтижелер көрсетті, – деп атап өтті Сәкен Сейфуллин атындағы гимназияның бастауыш сынып мұғалімі, педагог-зерттеуші Назгүл Жұмабекова.
Бұл жерде де жеңімпаздар аз емес. Бірінші орынды Шәкәрім атындағы гимназияның 4 сынып оқушысы Кира Ким иеленді.
Осы гимназияның үшінші сынып оқушысы Маржона Әлімжанова мен Сәкен Сейфуллин атындағы гимназияның 4 сынып оқушысы Айзере Медеу екінші орын алды. Қола медаль екінші сынып оқушысы Дильжан Қаракесековаға және Сәкен Сейфуллин атындағы гимназияның 3 сынып оқушысы Давид Болатовқа бұйырды.
Өмір БАЙБОСЫН