Елімізді елең еткізген жаңалықтың бірі XX ғасырдың көркем туындысы «Менің атым Қожа» фильмінің жалғасын табуы. 13 наурызда шыққан «Қожа. Жаңа саяхат» фильмнің таңқалдыратын әсері бар. Бұл туынды тек қызық оқиғамен ғана емес, жас ұрпаққа берері мол болып, әртістердің рөлге беріліп ойнауы әрі режиссердің шебер талғамы тәнті етеді.
«Қожа. Жаңа саяхат» – адам бойындағы кіршіксіз сезім мен махаббатты көрсетіп, көрермен қауымды биік ойға жетелейтін ерекше туынды. Қожа әкесінен мәңгі айырылып, соғыстың ауыр зардабы көрсетіле басталатын фильмнің сюжеті бірден баурап алады. Бәрімізге таныс Қожаның ендігі бастан кешкен оқиғалары фильм барысында қыза түседі, сондай-ақ, соңына қарай кейіпкеріміздің шыңдала түсуі қуаныш сыйлайды.
Бұл фильмнің ерекшелігі – режиссер Қуат Ибрагимовтың сұқбатында айтқанындай, фильм толықтай Б.Соқпақбаевтың повесіне негізделген. Асыға күткен фильмге бармас бұрын «Менің атым – Қожа» повесін оқып шықтым. Бастапқыда «Қожа. Жаңа саяхат» атты екінші бөлім, 1963 жылы «Қазақфильм» киностудиясы шығарған туындының «Qalan» студиясы жасаған жай заманауи көшірмесі болады деп ойладым. Алайда көргеннен кейін екі бөлімді салыстырып, біраз айырмашылық байқаған едім. Өз ісінің майталманы бола білген режиссер кейіпкеріміз Қожаберген Қадыровтың жазушылық саласын таңдап, осы арман жолында аянбай еңбек етуін басты назарға қояды. Сондай-ақ, көрермендер басты кейіпкердің өлең шығаратын қасиетін байқай алады әрі Нұрлан Санжарұлының да рөл сомдауы тосынсый іспетті болды. Тағы бір қызығы – фильмде Анафиса Михайловна атты орыс тілі пәнінің мұғалімі де кездеседі.
«Қожа. Жаңа саяхатты» көргеннен кейін жүректе ұялаған түрлі сезімді сөзбен жеткізу қиын. Бұл туынды – тек қызықты уақыт өткізудің амалы ғана емес, өмірдің мәнін түсіндіріп, қазіргі кезде өте маңызды әлеуметтік мәселелерді қозғаған қажырлы еңбектің жемісі болды.
Әсіресе, отандық кино өнерінің жылдан-жылға «Қожа» сияқты қызықты, пайдалы кино шығаратыны еліміз үшін үлкен мақтаныш. Егер сіз ерекше әсерге бөленгіңіз келсе, фильмді міндетті түрде көруге кеңес беремін.
Әділет АЙДАНБЕК,
Мағжан Жұмабаев атындағы гимназияның 11 сынып оқушысы