Тіл – тірі организм. Дамиды, түрленеді. Бұл үлкен ғылым һәм материя. Тілді оқытуда түрлі құрал мен әдістеме жасалады. Мемлекеттік тілдің қолданыс аясын кеңейту мақсатында Қарағанды облысының тілдерді дамыту жөніндегі басқармасы жанындағы Ресурстық тіл орталығының ұйымдастыруымен «Тілді оқытуда коммуникативті құзыреттілікті қалыптастырудың негіздері» тақырыбында облыстық әдістемелік семинар өтті.
27 наурыз «Достық үйі» ғимаратында өткен жиынға Қазақстан Республикасы Президенті жанындағы Мемлекеттік басқару академиясының академиялық қызмет жөніндегі вице-ректоры, филология ғылымдарының докторы, профессор Эльмира Оразалиева, Назарбаев университетінің Қазақ тілі және түркітану департаментінің оқытушысы, ҚАЗТЕСТ және деңгейлік оқулықтар мен ЛГМ авторы Айдар Балабеков, Назарбаев университетінің Қазақ тілі және түркітану департаментінің оқытушысы, педагогика ғылымдарының магистрі Күлән Көпеш арнайы спикер ретінде қатысты.
Семинардың шымылдығын ашқан Ресурстық тіл орталығының директоры Бибігүл Дауылбаева: «Басты мақсат – коммуникативті құзыреттілікті қалыптастыру үдерісінің маңыздылығын түсіндіріп, сөйлеу әрекеті түрлерімен белсенді жұмыс жүргізу жолдарын таныстыру, тіл мамандарына әдістемелік көмек көрсетіп, біліктілігін арттыру», – дейді.
Академик Е.Бөкетов атындағы Қарағанды зерттеу университетінің қауымдастырылған профессоры, филология ғылымдарының кандидаты, кафедра меңгерушісі Сағила Рахымберлина модераторлық қылып, тілді оқытудағы түйткілді мәселелерге тоқталып отырды.
Филология ғылымдарының докторы, профессор Эльмира Оразалиева «Коммуникативтік құзыреттілікті қалыптастыру: елтанымдық оқылым парадигмалары» тақырыбында баяндама жасады. Сөз барысында тілдік нормалар мен тіл мәселесіндегі кейбір жағдайға тоқталды.
«Оқылымды меңгерту кезінде студенттің жеке қасиетін, дара психологиялық табиғатын, ақпаратты қабылдау жылдамдығын, темпераментін, сұранысын ескеру арқылы тиімділігін арттырған маңызды. Тілдік білім берудің мазмұны сұраныс деңгейімен өлшенген кезде ұсынылатын ақпараттың қолданбалылығы қамтамасыз етілетіні анық. Қазақ тілі курстарының әдістемесі мен оқыту технологияларын мақсатты аудиторияның қызығушылық деңгейімен, елтанымдық ақпараттың өзектілігімен сабақтастыру негізінде «ұлттық сана», «ұлттық мәдениет», «тарихи таным» мен «этностық таным» алғышарттарын дамыту мүмкіндігі қарастырылады – дейді Эльмира Оразалиева.
Назарбаев университетінің Қазақ тілі және түркітану департаментінің оқытушысы, ҚАЗТЕСТ және деңгейлік оқулықтар мен ЛГМ авторы Айдар Балабеков «Тілдік құзыреттілік және дағды үйлесімділігі» тақырыбындағы баяндамада тілді оқытудағы түрлі әдістемеге тоқталып, мән-мағынасын түсіндіріп берді.
Ал Назарбаев университетінің Қазақ тілі және түркітану департаментінің оқытушысы, педагогика ғылымдарының магистрі Күлән Көпеш «Сөйлеу әрекетін дамытуда қолданылатын әмбебап кестелер» тақырыбындағы баяндамасында семинарға қатысушылармен ойын үлгісінде түрлі тапсырма беріп, әдістемесімен бөлісті.
Семинар соңында барлық қатысушыға сертификат тапсырылды.
Ерболат ЕРБОЛҰЛЫ