2025 жылғы 12 шілде күні Қарағанды қаласындағы Ұлттық ұланның «Орталық» өңірлік қолбасшылығына қарасты 6505 әскери бөлімінде салтанатты әскери ант қабылдау рәсімі өтті. Іс-шараға еліміздің әр өңірінен жиналған 450-ге жуық жас сарбаз қатысты.
Бұл — олардың әскери өмірге алғашқы қадам жасап, Отан алдындағы қасиетті борышын өтеуге берген серті. Әскери ант – әрбір жауынгер үшін үлкен жауапкершілік пен адалдықтың белгісі. Осы күні сарбаздар өздерінің Қазақстан Республикасына және халқына шексіз қызмет ететінін ресми түрде мәлімдеді.
Салтанатты іс-шараға сарбаздардың ата-аналары, туыстары мен жақын достары арнайы шақырылды.
Рәсім барысында әскери бөлім командирі мен шақырылған қонақтар сарбаздарға жылы лебіздерін білдіріп, әскери қызметтің абыройлы әрі маңызды міндет екенін атап өтті.
– Әскери ант – бұл жай ғана рәсім емес, бұл – әр сарбаздың жүрегіне жазылатын серт. Отан қорғаушы болу – ерлік пен табандылықты, батылдық пен адалдықты талап ететін асыл міндет, – деді әскери бөлім командирі полковник Мақсат Қырғызбаев.
Сонымен қатар, өнерпаз сарбаздар патриоттық әндер шырқап, мерекелік концерттік бағдарлама ұсынды.Салтанатты шара аяқталған соң ата-аналармен әскери бөлім командирі сұқбат жүргізіп, сарбаздарды сейілдемеге жіберді.
ҚР ІІМ ҰҰ “Орталық” Өңірлік қолбасшығының Баспасөз қызметі