Қазақ халқының батыр ұлы, даңқты қолбасшы, көрнекті жазушы Бауыржан Момышұлы – ел тарихында өшпес із қалдырған ұлы тұлғалардың бірі. Оның өмір жолы мен ерлігі, қайсар мінезі мен биік рухы бүгінгі жас ұрпақ үшін үлкен үлгі, тағылым мектебі.
Бауыржан Момышұлы ең алдымен Отанға деген шексіз сүйіспеншіліктің символы. Ол Ұлы Отан соғысы жылдарында ерлік пен батырлықтың жарқын үлгісін көрсетті. Қандай қиын жағдай болмасын, ел намысын бәрінен жоғары қойып, жауға қарсы тайсалмай күресті. Бұл – қазіргі жастар үшін патриотизмнің нағыз көрінісі. Жас ұрпақ туған жерін құрметтеп, елінің болашағы үшін жауапкершілік сезімін бойына сіңіруі тиіс.
Сонымен қатар, Бауыржан Момышұлы – тәртіп пен талаптың адамы. Ол әрдайым уақытты бағалап, өз ісіне үлкен жауапкершілікпен қараған. «Тәртіпке бас иген құл болмайды» деген сөзі бүгінгі күнге дейін өзектілігін жоғалтқан жоқ. Бұл қағида жастарды жинақылыққа, табандылыққа және еңбекқорлыққа тәрбиелейді.
Батырдың тағы бір ерекшелігі – оның білімге деген құрметі. Ол тек әскери адам ғана емес, терең ойлы жазушы ретінде де танылды. Өз шығармаларында адамгершілік, ерлік, намыс, адалдық сияқты құндылықтарды кеңінен насихаттады. Бұл жастарды рухани тұрғыдан байып, дұрыс жол таңдауға жетелейді.
Бауыржан Момышұлы жастарға әрқашан шыншыл болуды, әділдікті қорғауды және қорқақтықтан аулақ болуды үйретеді. Оның өмірлік ұстанымдары – батылдық, намыс, адалдық – кез келген жас үшін өмірлік бағдар бола алады.
Қорытындылай келе, Бауыржан Момышұлы – тек өткеннің батыры емес, бүгінгі және келешек ұрпақтың рухани ұстазы. Оның өнегелі өмірі мен асыл қасиеттері жастарды отансүйгіштікке, жауапкершілікке және биік мақсаттарға жетуге жігерлендіреді.
Гүлмира САҒАТОВА
«Әбілқас Сағынов атындағы Қарағанды техникалық университеті»