Қарағанды облыстық ардагерлер кеңесі Наурыз мерекесі мен алдағы Ұлы Жеңістің 80 жылдығы қарсаңында қазақ халқының ұлттық әдет-ғұрыптары мен салт-дәстүрлеріне арналған «Алтын қазық – Әжетай!» атты әжелердің облыстық байқауын өткізді.
Оны ұйымдастыруға былтыр ғана облыстық кеңес жанынан құрылған әжелер алқасы ұйытқы болды. Байқауға облыстың әр өңірінен бір-бір қатысушыдан, барлығы 14 үміткер қатысты. Қоғамдық ұйымдармен, мемлекеттік органдармен байланысып, беделді мамандардан қазылар алқасы құрылды. Оны облысқа белгілі тұлға, «Аманат» партиясы облыстық филиалының төрағасы Бекзат Алтынбеков басқарды. Алқа құрамында сондай-ақ Қазақстанның халық артисі, актер К.Жұмабеков, әнші Д.Ақатаева, сән ательесінің басшысы, модельер В.Исина, тіл маманы Д.Жұмагелдинова болды. Әжелер алқасының жұмыс тобы және әдістемелік көмек көрсеткен облыстық мәдениет басқармасының мамандары жан-жақты әзірлік жүргізді.
Әжелердің ұрпақ тәрбиелеудегі рөлін ескере отырып, кейбір сайыс түріне өз тәрбиесінен өткен балалары мен немерелерінің де қатысуына рұқсат етілді. Кәдімгі дүбірлі өнер сайыстарындай жанкүйерлері қолпаштап, демеп отырды. Жетпістен асып, сексеннің сеңгіріне тақап қалған ақ әжелер «Жан серігім – ән», «Мақал – сөздің мәйегі», «Салт-дәстүр сөйлесін», «Ақылгөйім – ақ әжем», «Білімпаз әже», «Қолөнер – зор өнер» деген тақырыптардағы сайыстарға қатысты. Қазақ халқының ғасырлар бойы жинаған әдет-ғұрыптарын бойларына қалай сіңіргенін көрсетті.
Әжелер байқауын облыстық ардагерлер кеңесінің төрағасы Ғ.Тұяқов кіріспе сөзбен ашты. Сонан кейін сахнаға бірінен соң бірі шығып, ақ әжелер өз өнерлерін паш етті. Олар алдын-ала жазып әкелген, өмірі мен өнерінің әр сәтін бейнелейтін бейне-роликтерін көрсетті. Салған беттен күміс көмей әншілік өнерлерін, басқа да қырларын таныта білді. Саран қаласынан қатысқан Гүлжан Жүсіпбекова туған өңірі туралы Біржанның «Көкшетау» әнін тамылжытса, егіндібұлақтық Қарлығаш Құсайынова да өскен өлкесін аңсап, Ілия Жақановтың «Балқантау» әнін шырқады. Шет ауданынан келген Гүлшара Ахметова соғысқа қатысқан атасы туралы жүрек жарды өлеңді орындады, осылай бірінен бірінің өнері асып жатты. Әділқазылар алқасына да жүлдегерлерді анықтау оңай болмады…
Ақыры байқаудың қортындысы да шығарылып, жеңімпаздар мен жүлдегерлер анықталды, оларға тиісті сый-сияпаттар жасалды, құшақ толы көктемнің гүл шоқтары ұсынылды. Байқаудың қортындысында 1 орын Гүлшара Хамиқызының еншісіне тиді, екі 2 орынды нұралық Нұрыш Нақыпова мен теміртаулық Зәуре Бейсембаева иеленді. Жүлделі 3 орынға Бәткен Раисова (Бұқар жырау ауданы) мен Рысжан Кәктаева (Ақтоғай ауданы) шықты. Көрермендердің көзайымы арнайы сыйлығына сәл басымдықпен қарағандылық әже Бәтима Қажыбаева ие болды. Бұған ұстаз әжесі үйреткен кішкентай Шерхан немересінің Қаз дауысты Қазыбектің қалмақ қонтайшысына айтқан сөзін шебер орындап беруі әсер еткені сөзсіз.
Ешкім марапаттан құралақан қалған жоқ. Жүлдегерлерге 40-80 мың теңге мөлшерінде ақшалай сыйлықтар мен мен дипломдар, қалған қатысушылырға жұбаныш сыйлықтар (25 мың теңге) мен Алғысхаттар тапсырылды.
Сайыс алдында қазақтың ежелгі дәстүрімен жанкүйерлері Достық үйінде Наурыз дастарқанын жайса, қолөнер шеберлері жұртшылықты өз туындыларымен таныстырды. Көрермендер әсіресе қазақшаға судай қарағандылық қол өнер шебері Надежда Ивановна Рымбаеваның тамаша экспонатына тамсанды. Нұралықтар мен балқаштықтардың да көрмесі үздік деп танылды. Жиналғандар алдына кәсіби «Арқа сазы» этнографиялық ансамблімен қатар сонау Қарқаралыдан келген мәңгі жас халықтық «Салтанат» ән-би ансамблі, ардагерлердің «Көзкөргендер», «Ақ ниет» сияқты көркемөнер ұжымдары концерттік бағдарламаларын ұсынды.
Байқауды ұйымдастыруға әжелер алқасының төрайымы ұстаз Жұмабике Адамова, ардагер журналистер, алқа мүшелері Гүлнар Бұхарбаева мен Назипа Асқар елеулі үлес қосты.
Бір сөзбен айтқанда, Әжелер байқауы Наурыз мерекесімен ұштасып, халыққа көтеріңкі көңіл күй сыйлады. Залға лық толы көрермендер риза болып тарасты.
Аман ЖАНҒОЖИН,
облыстық ардагерлер кеңесінің жауапты хатшысы