Биыл егемен еліміздің ең басты құжаты – Қазақстан Республикасының Конституциясына 30 жыл толып отыр. 1995 жылы 30 тамызда бүкілхалықтық референдумда қабылданған Ата Заңымыз мемлекетіміздің тәуелсіздігін нығайтып, демократиялық даму жолындағы бағыт-бағдарымызды айқындап берді. Конституция – еліміздің саяси, құқықтық және әлеуметтік жүйесінің негізін қалаған басты құжат, халқымыздың бірлігін, елдігіміздің тұтастығын бейнелейтін ұлы символ.
Әрбір мемлекеттің тарихында Конституцияның орны ерекше. Ол – халық пен билік арасындағы келісімнің, қоғамдағы тұрақтылық пен тәртіптің кепілі. Қазақстан Конституциясы мемлекетіміздің ең жоғарғы заңдық күші бар құжаты ретінде биліктің барлық тармақтарының жұмысын реттейді, азаматтардың құқықтары мен бостандықтарын қорғайды. Бүгінгі күні Қазақстан азаматының құқығы, еркіндігі мен міндеті айқын көрсетілген. Әсіресе, адамды, оның өмірін, құқықтары мен бостандықтарын ең жоғары құндылық деп тануы – Ата Заңымыздың демократиялық сипатын айқындайды.
Тәуелсіздіктің алғашқы жылдарында елімізге жаңа саяси-құқықтық жүйе қажет болды. 1993 жылғы алғашқы Конституциядан кейін қоғам дамуы мен мемлекеттік құрылымның ерекшеліктеріне байланысты толыққанды, заман талабына сай жаңа Ата Заңды қабылдау міндеті тұрды. Сол себепті 1995 жылғы Конституция халқымыздың еркін білдірген тарихи құжат болды. Ол мемлекеттің дамуына берік іргетас қалап, демократиялық институттардың орнығуына жол ашты.
Конституцияның арқасында Қазақстанда биліктің үш тармағы – заң шығарушы, атқарушы және сот тармақтары өзара теңгерім мен тежемелік жүйеде жұмыс істейді. Бұл – қоғамдағы әділеттілікті қамтамасыз ететін маңызды қағида. Сонымен қатар, Ата Заңымыз еліміздің көпұлтты халқының татулығын, бірлігін нығайтып, Қазақстанды өркениетті елдер қатарына қосуға ықпал етті.
Қазақстан Конституциясы тек құқықтық құжат қана емес, ол – елдіктің айнасы, мемлекетіміздің стратегиялық дамуының негізі. Әлемдік қауымдастық алдында Қазақстанның беделін арттырған да осы заңнамалық жүйенің беріктігі. Мемлекеттің саяси тұрақтылығы, экономикалық дамуы мен халықаралық аренадағы орны Конституция қағидаларына сүйеніп келеді. Сондықтан Ата Заңымыз – елдің бүгіні мен ертеңін айқындайтын темірқазық.
Сонымен қатар, Конституция күнін атап өту – тек мерекелік шара емес, ол – әр азаматқа заңға құрметпен қараудың, өз құқықтары мен міндеттерін білу мен орындаудың маңызын түсіндіретін күн. Конституцияға адалдық – елге адалдықтың бір көрінісі. Бүгінгі ұрпақ үшін бұл мерекенің тәрбиелік мәні зор. Өйткені жастарды отансүйгіштікке, заңға бағынуға, қоғам алдындағы жауапкершілікті сезінуге баулиды.
Бүгінде Конституция – Қазақстан халқының мызғымас бірлігінің, мемлекетіміздің тұрақты дамуы мен болашағының кепілі. Оның нормалары мен қағидалары ел өмірінің барлық саласында қолданылып келеді. 30 жылдық тарихында Конституциямыздың ережелері уақыт талабына сәйкес өзгерістерге де ұшырап, қоғам дамуына сай толықтырылып отырды. Мұның барлығы мемлекетіміздің алға жылжуына, жаңа сын-қатерлерге бейімделуіне мүмкіндік берді.
Қорытындылай келе, Ата Заңымыз – тәуелсіз Қазақстанның ең басты тірегі. Ол – халқымыздың таңдауы мен даналығының нәтижесі. Конституция – елдігіміздің айрықша белгісі, мемлекеттілігіміздің берік тұғыры. 30 жылдық мерейлі белес – барша қазақстандықтар үшін ортақ қуаныш әрі болашаққа деген сенімді нығайтатын тарихи кезең.
Ерболат ЕРБОЛҰЛЫ