Елде қылмыс 13 пайыз азайды. Атап айтқанда, кісі өлтіру, қарақшылық, тонау, бұзақылық пен ұрлық көрсеткіші төмендеді. Ішкі істер министрі Ержан Сәденовтің айтуынша, қазір Мемлекет басшысының қауіпсіз қала мен ауылдық ортаны құру тапсырмасы жүзеге асып жатыр. Полиция жұмысының нәтижесінде бүгінге дейін 10 мыңнан астам қылмыстың беті ашылып, 10 миллионға жуық әкімшілік құқық бұзушылықтың жолы кесілген. Сондай-ақ есірткі қылмысы мен экстремизмге қарсы қимыл да күшейтілді. Жыл басынан бері 4 жарым мыңнан астам есірткі қылмысы анықталып, 24 ұйымдасқан топ жойылды. Бұдан бөлек саланы жетілдіру мақсатында цифрландыру ісі қолға алынған. Қазір елде бейнебақылау желісі кеңейіп, адамның бет жүзін тануға және көлік ағынын талдауға қабілетті 19 мыңнан астам камера жұмыс істеп тұр.
