Қарағанды облыстық бейнелеу өнері мұражайында «Әлем балалардың көзімен» көрмесі өтті. Экспозицияға 6-17 жас аралығындағы №1 Балалар өнер мектебінің бейнелеу өнері бөлімінің оқушылары орындаған 300-ден астам композиция кіреді.
Олардың ішінде: пленэрлік зерттеулер, этюдтар, кескіндеме, графика, мүсін, сәндік-қолданбалы өнер бұйымдары.
– Жыл сайын мұражайда біздің есептік көрме өтеді. Біз бір қабырғаны оқушылардың дипломдық жұмыстарына арнадық. Біздің көркемсурет мектебінде балалар бес жастан бастап оқи бастайды, – дейді №1 Балалар өнер мектебінің бейнелеу өнері бөлімінің оқытушысы Гүлнұр Қуатқызы.
Көрмеге қатысушылардың бірі – 15 жасар Фатима Нұрғалиқызы негізінен кескіндеме, графикамен айналысады. Бірақ бұл жолы өзін сәндік-қолданбалы өнерде сынап көруді шешкен екен. Ол былғарыдан үйге арналған тұмар жасады.
– Көрмеде менің екі жұмысым бар – үйге арналған тұмар және інімнің портреті. Тұмар былғарыдан жасалған, мен желім, картон, пластикалық бөтелке мен тастарды қолдандым. Мұндай нәрсені бірінші рет жасадым, маған ұнады. Бұған дейін мен былғарыдан кілтке арналған салпыншақ жасауға тырыстым. Ал менің екінші жұмысым – інімнің портреті. Түрлі-түсті графика, қарындашпен салынған, – деді Фатима.
14 жасар Сәбина Көмектің жұмысы қазақтың ұлттық аспабы – домбыра туралы баяндайды.
– Менің жұмысымды «картоннан жасалған мүсін» деп атауға болады. Мен картон, ағаш, желім, тастар, қағаз, былғары және акрил қолдандым. Көрмеде менің бірнеше картинам бар, олар тарих пен табиғатқа арналған. Олардың арасында майлы бояулармен, графикалық көмірмен және гуашьпен жазылған жұмыстар бар, – деп атап өтті Сәбина.
Әділ БЕК