Мұхтар Әуезов атындағы орталық қалалық кітапханада Наурыз мерекесіне орай «Мәдениет және салт-дәстүр күні» аясында Е.Бөкетов атындағы Қарағанды зерттеу университетінің аға оқытушысы, психолог, Қазақстан Жазушылар одағының мүшесі, ақын Салтанат Смағұлтегімен «Менің сырым өлеңде» атты кездесу кеші ұйымдастырылды. Бұл шараға Қарағанды қаласындағы жоғары гуманитарлық колледжінің студенттері мен оқытушылары, сондай-ақ кітапхана оқырмандары қатысты.
Шараның мақсаты – өңірімізде ерекше орны бар қарымды қаламгердің өнегелі өмір жолы мен шығармашылығын жас ұрпаққа таныстыру, оларды әдебиетке, кітап оқуға баулу, қызығушылықтарын арттыру болды.
Кештің ашылуында жүргізуші ақынның өмірі мен шығармашылығы туралы баяндап, оқырман қауымын таныстырды.
Кездесу барысында тек поэзия туралы ғана емес, жалпы әдебиет, оның қоғамдағы маңызы туралы да кеңінен сөз қозғалды. Кеште өлең оқылып, ән шырқалып, оқырмандар мен ақын арасында әдебиет әлеміне қалай қадам басқаны туралы әңгімелер айтылып, естеліктермен бөлісті.
Арқаның ақын қызы кітапхана оқырмандарының қойған сұрақтарына ашық, шынайы әрі жүрекжарды жауаптар берді. Кеш барысында оқырмандардың өтініші бойынша ақын өз шығармашылығынан өлеңдерін оқып, шараның көркін одан әрі қыздырды. Шара нәтижесінде оқырмандар мен ақын арасындағы байланыс тереңдеп, әдебиетке деген құштарлық арта түскендей…
Махаббат Сәменова,
Мұқтар Әуезов атындағы
орталық қалалық кітапхананың
қызмет көрсету бөлімінің кітапханашысы