Қарағанды облысында суда құтқару жұмыстарын жүргізу үшін 10 мобильдік топ дайындалды, қоғамдық құтқарушылар да тартылуда. Шомылу маусымына дайындық туралы Төтенше жағдайлар департаментінің бастығы Мұрат Қатпанов аймақ әкімдігінде өткен аппараттық кеңесте баяндады.
1 мамырдан бастап ТЖД халықпен және су пайдаланушылармен ауқымды профилактикалық жұмыс жүргізеді. Полициямен бірлескен рейдтер, су айдындарында патрульдеу, жадынамалар табыстап, халықпен әңгімелер, жалпы мектептік желілер, балаларға арналған интерактивті сабақтар және ата-аналар чаттарында судағы қауіпсіздік ережелері таратылады.
– Суда құтқару жұмыстарын жүргізу үшін 10 мобильді топ дайындалды. Олардың құрамында 100-ге жуық адам, 20 бірлік техника және 25 жүзу құралы бар. Шомылу маусымы басталғанға дейін қалалар мен аудандардың әкімдіктері тағы 110 тыйым салу белгісін орнатуды жоспарлап отыр, – деді Мұрат Қатпанов.
Өткен жылы облыс бойынша сегіз коммуналдық жағажай құрылды. Тағы жеті ұйымдастырылған жүзу орнын іске қосу жоспарланған: бір-бірден Қарағанды мен Теміртауда, үшеуі Осакаров ауданында және екеуі Қарқаралы ауданында.
Атап айтқанда, бүгінде облыс орталығында Федоров су қоймасының аумағында екі коммуналдық жағажай жұмыс істейді. Биылғы жылы тағы бір учаскені дайындау көзделген – аңғар беткейді тегістеу, жағалауды ретке келтіру, қажетті белгілерді орнату және құтқарушылар тарапынан бақылауды қамтамасыз ету жоспарланған. Федоров су қоймасында бес жеке демалыс аймағын ашу жоспарда бар. Көгілдір тоғандарда тағы бір коммуналдық жағажай ұйымдастыру жұмыстары жүргізілуде.
Судағы қауіпсіздік үшін қажетті жабдықты сатып алуға қаражат бөлінді: дауыс зорайтқыштар, бақылау мұнаралары, ақпараттық баннерлер және т. б.
Мансап орталықтары арқылы 70-ке жуық қоғамдық құтқарушыларды тарту және оқыту жоспарлануда.
– Аудандар мен қалалардың әкімдері коммуналдық жағажайларды құру процестерін жеделдетіп, оларды су қауіпсіздігі ережелерінің талаптарына сәйкес дайындауы керек. Біз бұл бағытта қарқынды жұмыс істеуіміз қажет. Қауіпсіздік ережелерін бұза отырып, жеке жаппай демалыс аймақтарының ашылуына жол бермеу керек. Аудан әкімдері бұл мәселені тікелей бақылауда ұстауы тиіс, – деді облыс әкімі Ермағанбет Бөлекпаев.