Қарағанды облысында Ұлттық бірыңғай тестілеудің (ҰБТ) негізгі кезеңіне дайындық жүріп жатыр. Өңірлік коммуникациялар қызметінің брифингінде Ұлттық тестілеу орталығы облыстық филиалының директоры Динара Баймағамбетова мен мектепке дейінгі, жалпы орта және арнайы білім беру бөлімінің басшысы Гүлдана Нұрсұлтан 2025 жылы талапкерлер үшін жаңа мүмкіндіктер мен ережелерге енетін өзгерістер туралы айтып берді.
Басты жаңалық – өтініш беру мерзімі өзгертілді. 12-18 сәуірде бір рет, ал 19-25 сәуірде бір немесе екі рет өтініш беруге болады. Бұл ретте қатысушылар ҰБТ-ны екі рет тапсыра алады, ал грант конкурсында үздік нәтиже ескерілетін болады. Тестілеудің өзі 16 мамыр мен 5 шілде аралығында өтеді. Өтініштер app.testcenter.kz сайты және UTO.kz қосымшасы арқылы қабылданады. Әрбір қатысушы тестілеу күнін, уақытын және орнын өзі таңдайды. Қарағанды облысында үш орталық жұмыс істейді: Қарағандыда Қазтұтынуодағы экономикалық университет базасында және Қазақстан к-сі, 15а, сондай-ақ Балқашта.
ҰБТ форматы өзгеріссіз қалды: 120 тапсырма, оның ішінде 20-сы Қазақстан тарихы бойынша, 10-ы оқу сауаттылығы бойынша, 10-ы математикалық сауаттылық бойынша және екі бейінді пән бойынша 40 тапсырма. Ең жоғары балл – 140. Тест 4 сағатқа созылады, ал ерекше білім беру қажеттілігі бар балалар үшін – 40 минутқа ұзағырақ. Аудиторияларда академиялық адалдық үшін жағдайлар жасалған: металл детекторлар, бейнебақылау, байланыс тежегіштер.
Шекті баллдар өзгерген жоқ: 75 – педагогика және құқық үшін, 70 – медицина үшін, 65 – ұлттық жоғары оқу орындарына түсу үшін, 50 – басқа жоғары оқу орындары үшін.
Дайындыққа келер болсақ, қолжетімділікке баса назар аударылған. Тақырыптық онлайн-сабақтар өткізіледі, онлайн-платформалар жұмыс істейді, сынақ тестілеулері қолжетімді. ҰБТ-ның қаңтар және наурыз кезеңдерінен кейін мектептер балл аз жинаған тақырыптарды талдап, оқушыларға кемшіліктердің орнын толтыруға көмектеседі. Ұлттық тестілеу орталығының сайтында оқулықтардың тізімі, тарих бойынша 100 негізгі дата, информатика бойынша терминдер мен қазақ және орыс әдебиеті бойынша әдеби шығармалар тізімі жарияланған. Ауылдық аудандарда «Сандық мұғалім» жобасы іске асырылуда, ол ҰБТ-ға дайындалып қана қоймай, академиялық үлгерімі төмен оқушыларға қолдау көрсетеді. Үздік қалалық мектептер тәжірибе алмасу және әдістемелік қолдау үшін ауылдық мектептерге бекітілген.
– Бүгінде әрбір талапкердің таңдауы бар – тест тапсыру керек пе, жоқ па, ЖОО-ға түсу керек пе. Және қандай негізде әрекет етеді. Мемлекет оқушылар мен колледж түлектері өздеріне қолайлы жағдайда ҰБТ-дан өтуі үшін барлық жағдайды жасады, – деп атап өтті мектепке дейінгі, жалпы орта және арнайы білім беру бөлімінің басшысы Гүлдана Нұрсұлтан. – Сондай-ақ түлектер қашан ҰБТ тапсыратынын өздері таңдайды: қыста (қаңтарда), көктемде (наурызда), жазда (конкурстық негізде – республикалық грантқа қатысу үшін) немесе тамызда (ақылы негізде). Тестілеудің негізгі кезеңі жазда өткізіледі және оның нәтижелері республикалық гранттарды бөлу кезінде ескеріледі. Жоғары нәтиже жинаған қатысушы елдің кез келген ЖОО-на түсе алады.
Ерік РЫМҒАЛИЕВ