Қарағанды облысының мәдениет, архивтер және құжаттама басқармасының бастамасымен «Жас қаламгер» жобасының алғашқы жиыны өтті. Бұл игі шара жас ақын-жазушылардың басын қосып, жаңа шығармашылық серпін берді.
Жиын барысында Қазақстан Жазушылар одағының Қарағанды облысы бойынша төрағасы, ақын Жанат Жаңқашұлы жас буынға арнап тағылымды шеберлік сағатын өткізді. Әдебиеттің өрісі, қаламгердің жауапкершілігі, сөз өнерінің құдіреті жайлы ой қозғалып, еркін пікір алмасу алаңы құрылды.
Бұл жиында академик Е.А.Бөкетов атындағы Қарағанды ұлттық зерттеу университетінің жанынан құрылған «ҮКІЛІ ҮМІТ» шығармашыл жастар клубының мүшелері де өз ойларымен бөлісіп, әдебиетке деген ыстық ықыласын танытты.
Алдағы уақытта аталмыш жоба жас дарындарға жол ашып, түрлі әдеби басқосулар мен тағылымды шараларға ұласпақ.
Ерік РЫМҒАЛИЕВ