2026 жылғы 28 қазанда Қазақстан Президенті Қасым-Жомарт Тоқаевтың Қазақстан халқына Жолдауында дәрігерлер мен медицина қызметкерлеріне қатысты бірқатар маңызды міндет айтылды. Негізгі назар алғашқы медициналық көмекті дамытуға, учаскелік дәрігерлердің жалақысын көтеруге және медициналық қызметтің қолжетімділігін арттыруға аударылды.
- Учаскелік қызмет мамандарының жалақысы 40%-ға дейін өседі.
2027 жылғы 1 қаңтардан бастап үздіксіз еңбек өтіліне қарай учаскелік қызмет мамандарының жалақысын 40%-ға дейін арттыру тапсырылды. Бұл шара 77 мыңнан астам медицина қызметкерінің табысын көтеруге бағытталған.
- Жалпы практика дәрігерлерінің өкілеттігі кеңейеді.
Отбасылық және жалпы практика дәрігерлерінің мүмкіндіктерін кеңейтіп, халыққа алғашқы медициналық-санитариялық көмектің сапасын жақсарту көзделген.
- Денсаулық сақтау саласын қаржыландыру артады.
Алғашқы медициналық көмек жүйесін қаржыландыру көлемін кезең-кезеңімен ұлғайту міндеті қойылды.
- Ана мен бала денсаулығына көңіл бөлінеді.
Ел бойынша сегіз заманауи перинаталдық орталық және жеті көпбейінді балалар ауруханасын салу жоспарланған.
Маңыздысы: Жолдаудағы 40%-ға дейін көтеру туралы тапсырма барлық дәрігерлердің жалақысын бірдей 40%-ға арттыру дегенді білдірмейді. Ол учаскелік қызмет мамандарына және олардың үздіксіз еңбек өтіліне байланысты қарастырылған. Нақты есептеу тәртібі тиісті іске асыру құжаттарына байланысты болады.
Аңғар СМАҒҰЛ