Өткен жексенбі күні Ақадыр кентінің Мәдениет үйінде жылдағы дәстүр бойынша аймақтық «Жігіт сұлтаны — 2025» байқауы өтті. Аталған дода ұлы ақын, философ Абай Құнанбаевтың туғанына 180 жыл толуына және ІІ Дүниежүзілік Ұлы Отан соғысындағы Жеңістің 80 жылдығына арналды. Мұндай шара ата салтын насихаттауды, нағыз қазақ жігітінің бойындағы қасиеттерімен таныстыруды көздейді. Байқауға қатысқан әрбір жігіттің бойындағы ойлау, әр түрлі жағдайлардан шыға білу, өнерін көрсету, тапқырлығын, сахна мәдениетін қалыптастыру қабілеттерін дамытатыны сөзсіз. Сонымен бірге салт – дәстүрімізді ардақтайтын, өз елінсүйер нағыз қазақ жігітінің қасиеттерін бойына сіңіре білер ұрпақты тәрбиелеу мақсаты тұрады.
Қазылар алқасының сапында болған пауэрлифтингтен 4 дүркін әлем чемпионы, ҚР еңбегін сіңірген жаттықтырушы, халықаралық дәрежедегі спорт шебері, «Шет ауданының Құрметті азаматы» Оспанов Дәрібай, Шет ауданының жастар ресурстық орталығының директоры Ибрайкин Мадияр, кентімізде бокс мектебін ашқан Ақселеуов Асхат, «Жігіт сұлтаны» байқауларының ең алғашқы және соңғы сайыстарының жеңімпаздары Жақаев Алшағыр, Сейіт Наурызбай әділ бағаларын берді.
Байқауда бақтарын сынауға Шет ауданының Ақадыр, С.Сейфуллин, Мойынты, Дәрия, Ақшатау кенттерінің, Ақсу – Аюлы, Кеншоқы ауылдарының, Ақтоғай ауданының Үшарал ауылының жігіттері, барлығы 9 адам қатысты. Жігіттердің сайысы 5 кезеңнен тұрды. Олар «Тегімді менің сұрасаң» (өзін – өзі таныстыру), «Жігітке жеті өнер аз» (Жеңістің 80 жылдығына орай қазақтан шыққан батырлар жайлы қойылым немесе монолог дайындау), «Сұрақ – жауап» (салт – дәстүр мен Абай Құнанбаевқа байланысты), «Күш атасын танымас» (кір тасын көтеру), «Ұлттық киім үлгілерін дәріптеу» (ұлттық киім үлгілерін көрсету және көпшілікке таныстыру) болды.
Бірнеше сағатқа созылған шараның қорытындысы бойынша бас жүлдені Ақсу-Аюлы ауылынан келген аудандық мәдени–сауық орталығының қызметкері Аханов Бекзат Нұрланұлы жеңіп алды. І орынды Дәрия кентінің сайыскері Әнуархан Жанкелді иеленсе, екінші-үшінші орынды кеншоқылық Мәжит Бекболат Бағдатұлы, ақадырлық Наурызбай Шыңғыс Асхатұлы місе түтты. Ал енді «Көрермендер көзайымы» жүлдесі мойынтылық Тұрар Қабайға табыс етілді.
Жеңімпаздар мен жүлдегерлер Ш.Бейсекқызы атындағы мәдени-сауық және аудандық жастар ресурстық орталықтары дайындаған арнайы грамоталар мен бағалы сыйлықтармен марапатталды.
Кеш барысында көрермендер алдында мәдени-сауық орталығының әншілері Дана Данабекова, Айзада Рыспекова, Данияр Мадин, Айбота Қалабаева, «Әсем-ай» бишілер тобы, басқа да кештің қонақтары өз өнерлерін ортаға салды.
Жігіттердің сайысын тамашалаған көрермендер мен кент қонақтары олардың көрсеткен өнеріне тәнті болып, ризашылықпен тарқасты.
Қалижан БЕКҚОЖИН,
Ақадыр кенті