Қазақ халқының рухани мәдениетінде Абай Құнанбайұлының алатын орны ерекше. Ол – қазақ әдебиетінің ғана емес, ұлттық ой-сананың дамуына зор үлес қосқан ұлы ақын, ағартушы және философ. Абайдың өлеңдері мен қара сөздері адамгершілік, білім, еңбек, әділдік, ар-ождан, елжандылық сияқты мәңгілік құндылықтарды дәріптейді. Сондықтан оның шығармаларын студент жастар арасында кеңінен насихаттау – уақыт талабынан туындаған маңызды міндеттердің бірі.
Студенттік кезең – тұлғаның дүниетанымы қалыптасып, өмірлік ұстанымдары айқындалатын ерекше уақыт. Осы кезеңде Абай шығармаларын оқу жастардың сыни ойлау қабілетін дамытып, ұлттық құндылықтарды терең түсінуге мүмкіндік береді. Ақынның қара сөздерінде көтерілген білімге ұмтылу, өзін-өзі жетілдіру, адал еңбек ету, жауапкершілік пен адамгершілік қағидалары қазіргі қоғам үшін де өзекті.
Абай мұрасын насихаттау тек әдеби шығармаларды оқумен шектелмеуі тиіс. Ең бастысы – оның айтқан ойларын күнделікті өмірде басшылыққа алып, білімге ұмтылу, еңбекқорлық, әділдік пен ізгілік қағидаларын іс жүзінде жүзеге асыру. Бұл студенттердің кәсіби білікті маман ғана емес, рухани бай, саналы азамат болып қалыптасуына негіз болады.
Қорыта айтқанда, Абайдың өлеңдері мен қара сөздерін студент жастар арасында кеңінен насихаттау – ұлттық руханиятты нығайтудың, жастардың адамгершілік және интеллектуалдық әлеуетін арттырудың тиімді жолы. Ұлы ойшылдың мол мұрасы қазіргі және келешек ұрпақ үшін сарқылмас рухани қазына болып қала береді.
Қаламқас ҚАЛЫБЕКОВА,
Қарлығаш НҰРЖАНОВА,
Әбілқас Сағынов атындағы Қарағанды техникалық университеті