ӘРБІР ЖҮРЕК СОҒЫСЫНЫҢ АРТЫНДА — БҮТІН БІР ӨМІР: ҚАРАҒАНДЫДА 19 КҮНДІК НӘРЕСТЕГЕ ОПЕРАЦИЯ ЖАСАЛДЫ
Қарағанды қаласының Облыстық көпбейінді кардиологиялық орталығында туа біткен жүрек ақауының аса ауыр түрі бар жаңа туған нәрестеге күрделі операция сәтті жасалды.
Кішкентай нәресте Әмірге небәрі 19 күн. Оған өкпе веналарының толық аномальды дренажы диагнозы қойылған — бұл өкпеден жүрекке қанның қалыпты ағымы бұзылатын ауыр патология. Сонымен қатар, балада ашық артериялық өзек және қарыншааралық перденің бұлшықетті ақауы анықталған. Бұған дейін жаңа туған нәрестеге асқазан-ішек жолының қатар жүретін патологиясына байланысты операция жасалған.
Күрделі хирургиялық араласуды жүргізу үшін Қарағандыға UMC Жүрек орталығының мамандар тобы келді. Команданы балалар кардиохирургиясы бөлімінің меңгерушісі Дмитрий Горбунов басқарды. Команда құрамында анестезиолог-реаниматолог, перфузиолог және кардиолог та жұмыс істеді. Операция Қарағанды қаласының Облыстық көпбейінді кардиологиялық орталығының балалар кардиохирургиясы бөлімінің мамандарымен бірлесіп жүргізілді.
Өңір үшін бұл — маңызды тәжірибе. Бұған дейін мұндай операциялар Қарағандыда көп жыл бұрын жасалған. Қазір бұл Қарағанды облысының өзінде туа біткен жүрек ақауының аса ауыр түрлері бар балаларға жоғары технологиялық медициналық көмекті жергілікті жерде көрсетуге мүмкіндік беретін маңызды қадам.
Мамандардың бірлескен жұмысы хирургтар, анестезиологтар, перфузиологтар мен кардиологтар арасында тәжірибе алмасуға да мүмкіндік берді. Мұндай жұмыс форматы болашақта жаңа туған нәрестелерге күрделі операцияларды өз бетінше жүргізе алатын кәсіби команданы қалыптастыруға мүмкіндік береді.