Қарағанды облысында үздік он колледж студенті анықталды. Олардың барлығы «Қазақстан Республикасы колледждерінің үздік 100 студенті» байқауында өңірдің намысын қорғайтын болады.
ҚР Білім министрлігі бекіткен жыл сайынғы байқаудың облыстық кезеңіне өңірдің 23 колледжінен 69 студент қатысты.
Қазылар алқасы қатысушылардың ұсынған уәждемелік хаттары мен бейнероликтеріне сүйене отырып, жеңімпаздарды анықтады. Шарттарға сәйкес, конкурсқа қатысушылар ұлттық құндылықтар мен кәсіби дағдыларды дәріптеуге баса назар аударуы тиіс болатын.
– Менің мамандығым – музыкалық білім беру болғандықтан, мен өз бейнемде дәстүрлі қазақ музыкасын, ұлттық өнерді зерделеуді негізге алдым. Бірақ, менің ойымша, жеңімпаздардың қатарына қосылуға тек осы ғана емес, портфолио да көмектесті: мен белсендімін, көптеген байқаудың, соның ішінде WorldSkills байқауларының қатысушымын, – дейді Қарағанды жоғары гуманитарлық колледжінің төртінші курс студенті Мәдина Кәрімова.
Комиссия республикалық байқауда Қарағанды облысынан өкілдік ететін он студентті таңдады. Олардың есімдері: Аяна Кәдірбаева, Бекарыс Спабеков, Мәдина Кәрімова, Ернар Ризабек, Әйгерім Берікбол, Әнел Тикенова, Разия Әбдуәлі, Айбар Жоланов, Гүлпахат Құттыбаева және Нұрдос Түсенов.
Байқаудың республикалық кезеңінде қазылар алқасы студенттердің жұмыстарын бірнеше бағытта бағалайтын болады: білім беру, өнер және гуманитарлық ғылымдар, денсаулық сақтау және әлеуметтік қамсыздандыру, жаратылыстану ғылымдары, математика және статистика, ақпараттық-коммуникациялық технологиялар, бизнес, басқару және құқық, әлеуметтік ғылымдар және ақпарат, ауыл, орман, балық шаруашылығы және ветеринария, инженерлік, өңдеу және құрылыс салалары.
– Республикалық кезеңге қатысушыларға қойылатын талаптар өте қатаң деп айтпас едім. Біз өз жобамызды ұсынуымыз керек. Мен әзірге оның тақырыбын ойлап жатырмын. Менің әзірге қажеттінің бәрін дайындауға уақытым бар. Әрине, жеңіске жетуге үміттенемін, – деп бөлісті Мәдина Кәрімова.
Топ-100-ге енген студенттер Білім министрлігі ұйымдастырған тренингтерге, шеберлік сабақтарына және семинарларға қатысу мүмкіндігіне ие болады.