Наурыз – көктем мен жаңару мерекесі. Бұл Қазақстанның ең сүйікті және ауқымды мерекелерінің бірі. Сол себептен Ұлыстың ұлы күнін жылдағы дәстүр бойынша еліміздің барлық қала, аудан, кент, ауылдары кеңінен атап өтетіні баршамызға мәлім.
Дана халқымыз «Жас келсе іске…» дегендей, осыдан екі жыл бұрын «Балбөбек» бөбекжайының директоры қызметіне келген Бақтыбаева Қырмызы Дауылбайқызы өзінің ерекше іскерлігін, ұйымдастырушылық қабілетін көрсетіп жүрген мекеме басшыларының бірі.
Балабақша-бөбекжай кентіміздегі мектепке дейінгі балаларға тәрбие, білім беретін мекемелердің ішіндегі «қара шаңырағы» іспеттес. Сол теңеуге тең келтіргендей жылда Наурыз мерекесі болсын, Тәуелсіздік күніміз болсын, басқа да мемлекеттік мерекелерде, елдімекенімізде орын алатын абаттандыру, көркейту, көгалдандыру шараларында, халыққа көрсететін қайырымдылық істерінде алда жүріп, бастамашыл қадамдардың көбісі осы жерден көшін бастайды.
Біраз жыл «Нұршуақ» балабақшасында қызмет етіп, жұмысының қыр-сырына қанық болған жас директор кентіміздегі, одан салды аудан көлеміндегі мемлекеттік мекемелері арасында құрметті басшылардың қатарында. «Еңбегінен ел таныр» деп осындай адамдарды айтар.
«Балбөбек» бөбекжайының ауласында өткен «Қош келдің, әз-Наурыз!» атты мерекелік шараға кішкентай бүлдіршіндер, олардың ата-аналары, бөбекжай ұжымы, ауыл үлкендері, кент тұрғындары қатысты.
Құттықтау сөз алған Қазақстанның Журналистер одағының мүшесі, Шет ауданының Құрметті ардагері Бекқожин Қ.Қ, Шет аудандық мәслихатының депутаты, жергілікті кәсіпкер Есжанова Н.Т, кент әкімдігінің бас маманы Тасырбаева Г.Б, «Балбөбек» бөбекжайының директоры Бақтыбаева Қ.Д. жиналған тойшыл қауымға өздерінің жүрекжарды тілектерін арнады.
Мерекелік шаралардың ашылу салтанатынан кейін қазақтың дәстүрі бойынша ақ әжелер тойшыл қауымға шашуларын шашты.
Әншілер Алмас Қайрат пен Дана Данабекова жиналған халықтың алдында Наурызға арналған әндерін нақышына келтіре орындады.
Балалар дайындаған мерекелік концерттің алғашқы нөмірін «Балапан» тобының бүлдіршіндері «Әжемнің шәйі» әнімен ашты. «Жұлдызай» мектепалды даярлық тобының балалары Рамазан айына арнап «Жарапазанды» орындады. Ал «Қарлығаш» ересектер тобының балғындары Мүсілім мен Көзайым «Наурыз» әнін орындап, көрермендердің көңілінен шыға білді.
Балалардың өнерлерін тамашалап біткен соң, кезек қазақтың ұлттық ойындарына берілді. Бір қызығы, бұл сайыстарға бүлдіршіндермен қатар бөбекжайға баратын балалардың ата-аналары да қатысты. Қазақтың көне ойындары арқан тарту, кір тасын көтеру, асық ату сайыстары өте қызықты, әрі әсерлі болып өтті. Жеңімпаздар мен жүлдегерлер бөбекжай әкімшілігі дайындаған марапаттарға ие болды.
Шараға қатысушылар балабақша алаңындағы арнайы тігілген киіз үй ішінде қолөнер шеберлерінің көрмесін, ұжымның және оның мүшелерінің, тәрбиеленуші балалардың түрлі байқау, конкурстарда жеңіп алған жүлделерін, басқа да жетістіктерін тамашалай алды.
Шараға қатысушыларға ата-аналар және ұжым мүшелері қазақтың ұлттық тағамдарын ұсынды. Тіл үйіретін ет, қазы-қарта, қуырдақ, палау, бауырсақ, жент, талқан, қуырылған бидай, ашыған көже, айран, қатық, құрт, қаймақ, балқаймақ, небір тәттілер, бәрі де болды. Шараға қатысушылар арасынан мерекеге арнайы дайындалған наурыз көжеден татып көрмегендері болмады.
Кент тұрғындары өткізілген той-думанға ризашылықтарын білдіріп, көтеріңкі көңіл-күймен үйлеріне тарқасты.
Қалижан БЕКҚОЖА,
Ақадыр кенті