Ақадыр кентінде соңғы жылдары балалар және жасөспірімдер арасында спорттың бокс түрі дамып келеді. Бұған себепші болған өз ісінің шебері, бокс десе ішкен асын жерге қойған жаттықтырушы, тәлімгер Ақселеуов Асхат Тәжібайұлы десек артық айтқандығымыз емес.
Осы спорт түрінің дамуына өзіндік үлесін айтулы жерлесіміз, меценат, «Астана Motors» компаниясының президенті Смағұлов Нұрлан Еркебұланұлы да қосып отыр. Республикаға танымал жерлесіміз спорт мектебіне бокс рингін, басқа да керек-жарақ жабдықтарын демеушілік есебінен алып берген болатын. Міне, енді сол қамқорлық өзінің жемісін бере бастады.
Жуырда Қарағанды қаласында Қазақстан Республикасына еңбегі сіңген жаттықтырушы Б.Орумбаевты еске алуға арналған бокстан 2011-2012 жылдары туған жасөспірімдер арасында республикалық турнир өтті.
Аталған жарысқа Астана, Алматы қалаларының, Ақтөбе, Ақмола, Қарағанды, Ұлытау облыстарының, өзіміздің облысымыздың қалалары мен аудандарының командалары қатысты.
Шет ауданының намысын Ақадыр кентінің Балалар және жасөспірімдер спорт мектебінің боксшылары да қорғады. Бес күнге созылған турнирде ақадырлық жерлесіміз Наскенов Нұртай 55 кг салмақ дәрежесінде топ жарып, бірінші орынды иемденді. Жеңімпазымызға және оның жаттықтырушысына, жалпы осы спорт түрімен айналысып жүрген жас боксшыларымызға бұдан да биік белестерді бағындырып, Олимпиада төрінен көруді жазсын дейміз.
Қалижан БЕКҚОЖА,
Ақадыр кенті