Қарағанды облысының әкімі Ермағанбет Бөлекпаев «Amanat» партиясының филиалында кезекті азаматтарды жеке қабылдау өткізді. Мұндай кездесулер тоқсан сайын ұйымдастырылып, өңір тұрғындарына аймақ басшысына тікелей өтініш білдіруге мүмкіндік береді.
Бұл жолы қабылдауға облыс орталығынан ғана емес, аудан-аудандардан келген тұрғындар да жазылды. Тақырыптар сан алуан болды: медициналық көмек, кәсіпкерлікті дамыту, жер мәселесі және инфрақұрылымдық қамтамасыз ету.
Мәселен, сирек кездесетін дертке шалдыққан баланың анасы бұған дейін өмірлік маңызды дәрі-дәрмекті жеделдетіп сатып алу жөнінде өтініш білдірген еді. Қазір ол мәселенің шешілгенін айтып, билікке қамқорлығы үшін алғыс білдірді.
Ал Бұқар жырау ауданынан келген тұрғын бау-бақшамен, жеміс өсірумен айналысады. Оның алма бағы бар. Ол этноауыл жобасын жүзеге асырғысы келеді, бірақ оған жер учаскесі қажет. Әкім Ермағанбет Бөлекпаев бұл бастаманы жан-жақты зерттеп, содан кейін нақты жауап беруді тапсырды.
Жалпы айтқанда, қабылдау барысында көтерілген барлық мәселе қолданыстағы заңнама аясында қарастырылып, көмек көрсету мүмкіндіктері зерделенетін болды.