Қарағанды облысында орталықтандырылған су әлі күнге дейін бірнеше ауылдық округке жеткен жоқ. Сапалы ауызсумен қамтамасыз ету жалғасуда. Бүгінде ауылдықтардың 93,6%-ы орталық сумен жабдықталған. Келесі жылы бұл көрсеткіш 100%-ға жетеді деп жоспарланып отыр.
Облыстық Энергетика және тұрғын үй-коммуналдық шаруашылық басқармасы басшысының орынбасары Арман Сәттібаевтың айтуынша, 117 ауылда су бар, бірақ оның өзі тұрғындар аулаларында өздері қазып алған ұңғымаларда ғана. Осылайша, 13 мыңнан астам адам әлі күнге дейін орталықтандырылған суға зәру.
– Биыл 15,6 млрд теңгеге 38 сумен қамту нысаны іске асырылуда. Жыл соңына дейін 14 құрылыс нысаны мен 26 кешенді блок модулін пайдалануға беруді жоспарлап отырмыз, – дейді Арман Сәттібаев.
Алайда орталық су құбырына қосылатын ауылдық округтердің нақты саны әлі толық анық емес. Бұл ретте Энергетика және тұрғын үй-коммуналдық шаруашылық басқармасы басшысының орынбасары өңірді ауызсумен толық қамту келер жылы ғана жүзеге асатынын айтады. Ауызсумен қамту бағдарламасын аяқтау үшін қарағандылық шенділер республикалық бюджеттен тағы 3,5 миллиард теңге бөлу туралы жоғары тұрған органдарға сұраныс жолдаған.
Бүгінде жергілікті атқарушы органдар кешенді блоктық модульдер арқылы ауылдық елдімекендерге ауызсу тартуды көздеп отыр. Бұқар жырау ауданының әкімі Ерлан Құсайын:
– Биыл үш елдімекенге су құбыры тартылады. Келер жылы тағы төрт ауылға кешенді блок модульдерін орнату жоспарланса, тұрғындар одан бас тартып отыр. Олар үйлеріне орталықтандырылған су құбыры тартылғанын қалайды. Сонымен қатар бір ауылдың аумағында сібір жарасынан өлген малдар көмілген мал қорымдары бар. Тиісінше, ол жерге тіпті блоктық модуль орнату да мүмкін емес, яғни суды тасымалдау ғана қалды, – дейді.
Егер Бұқар жырау ауданында айтылған мәселелерге қарамастан, сумен қамтамасыз ету жағдайы жақсы көрсеткіштердің бірі болса, ауызсумен қамтудың ең төменгі көрсеткіші Қарқаралы ауданында қалып отыр. Біле білгенге Қарқаралы – Балқаштан кейінгі облыс бойынша туристік аймақ. Аудан әкімі Әділжан Арғынов уәде еткендей, жыл соңына дейін 46 елдімекен сумен қамтылады. Тағы бір су мәселесі бар аудан – Шет ауданы, оның әкімі Мұхит Мұхтаров та 29 ауылдық округ пен ауылға су келеді деп сендірді. «Қарағанды облысы бойынша барлығы 225 ауыл орталықтандырылған сумен қамтылған. Ауызсумен қамту мәселесі үнемі бақылауда», – деген болатын арнайы жиында Қарағанды облысының әкімі Ермағанбет Бөлекпаев.
«Алда тұрғындардың, әсіресе ауылдық жерлердегі өмір сүру сапасына тікелей әсер ететін сумен жабдықтау желілерін салу және қайта жаңарту бойынша үлкен жұмыс күтіп тұр. Міндеттер айқындалып, қаржыландыру мәселесі шешілуде. Бұл – бюджетті құру кезінде ескерілуі тиіс бірінші кезектегі міндет. Жұмысты дұрыс ұйымдастырып, жауапкершілігімізді ұмытпағанымыз абзал», – деп тапсырма да берді аудан әкімдеріне Ермағанбет Бөлекпаев.
Естеріңізге сала кетейік, Президент Қасым-Жомарт Тоқаев Үкіметтің жергілікті атқарушы органдарға 2025 жылға қарай халықты 100 пайыз таза ауызсумен қамтамасыз ету міндетін қойған болатын.
Әдебиет БЕЛГІБАЙҰЛЫ