Қарағандылық спортшылар 100 торкөзді дойбыдан өткен Қазақстан чемпионатында сәтті өнер көрсетіп, әртүрлі дәрежедегі алты медаль жеңіп алды. Астанада өткен турнир дәстүрлі түрде елдің ұлттық құрамасына іріктеудің негізгі кезеңдерінің бірі саналады.
Жарыс қорытындысы бойынша қарағандылық дойбышылар жүлделі орындарға ие болып қана қоймай, халықаралық турнирлерде Қазақстан намысын қорғайтын ұлттық құрама сапынан да орын алды.
Чемпионаттың басты кейіпкерлері өз жас санаттарында жоғары нәтиже көрсеткен қарағандылық спортшы қыздар болды.
Софья Рынгач 20 жасқа дейінгі қыздар арасында абсолютті чемпион атанып, рапид пен блиц бағдарламаларында екі алтын медаль жеңіп алды.
10 жасқа дейінгі санатта сынға түскен Камилла Қасенова еліміздің ең болашағы зор жас дойбышыларының бірі екенін тағы бір мәрте дәлелдеді. Жуырда Азия чемпионатындағы алғашқы халықаралық тәжірибесін жинақтаған спортшы блицте алтын медаль иеленсе, классикалық бағдарлама мен рапидте күміс жүлдегер атанды.
Қарағанды құрамасының ең жас мүшесі – Нұрлан Әлтайыр (2018 жылы туған және одан кіші спортшылар санаты) – табандылық танытып, блиц бағдарламасында қола жүлдеге қол жеткізді.
– Команданың нәтижесіне көңіліміз толады. Камилла жоғары дайындық деңгейін көрсетті, сонымен қатар алдағы уақытта жетілдіруді қажет ететін бағыттарды да анықтады. Софья өте тамаша өнер көрсетіп, біздің күткенімізден де асып түсті. Егер біз тек блиц пен рапидте ғана емес, барлық үш бағдарламада бақ сынағанда, тағы бір алтын медаль алуға мүмкіндігіміз болатын еді. Соған қарамастан, ел чемпионатындағы алты жүлде – спортшылар мен жаттықтырушылардың үлкен еңбегінің заңды нәтижесі әрі өте жақсы көрсеткіш, – деді Қарағанды облыстық дойбы федерациясының президенті Юлия Рынгач.
Айта кету керек, 2026 жылдың алғашқы жартыжылдығында ғана Қарағанды облысының дойбы құрамасы республикалық жарыстарда 12 медаль жеңіп алды.
Енді қарағандылық спортшыларды Қазақстан ұлттық құрамасының сапында халықаралық жарыстарға дайындық кезеңі күтіп тұр.
Ерік РЫМҒАЛИЕВ