Қарағанды облысында 1 тамызда дәстүрлі «Мектепке жол» республикалық акциясы басталды. Ол 30 қыркүйекке дейін жалғасады. Сондай-ақ, жаңа оқу жылы қарсаңында әлеуметтік осал топтағы отбасыдан шыққан 13 мыңға жуық бала жалпыға бірдей білім беру қорынан қаржылай көмек алады.
Биыл ақшалай төлемнің мөлшері 43 407 теңгені құрайды. Өңірлік коммуникациялар қызметі платформасында өткен брифингте Білім басқармасы басшысының орынбасары Бақтығүл Әдекенова материалдық көмек кімге берілетінін айтты.
– «Мектепке жол» акциясы жыл сайын тұрмысы нашар және көп балалы отбасылардан шыққан оқушыларға оқу жылына дайындалуға жәрдемдесу және әлеуметтік жағдайының кесірінен мектептен қалудың алдын алу үшін өткізіледі, – дейді Бақтығүл Әдекенова. – Оған демеуші ретінде барлық тілек білдірушілер қатыса алады. Акция аясында мектептерде » балаларға жақсылық бер!», «Ауыл балаларына-мектепке сыйлықтар», «Отбасы отбасына көмектеседі: баланы мектепке жинаймыз!» деген үндеумен қайырымдылық шаралары өткізіледі.
Сондай-ақ, өңірде «Жұмыспен қамту», «Түнгі қаладағы балалар», «Қамқор» арнайы рейдтері өтеді. Жәрмеңкелер ұйымдастырылады, онда ата-аналар мектеп тауарларын төмендетілген бағамен сатып ала алады.
– Жаңа оқу жылы қарсаңында жалпыға бірдей білім беру қорының қаражаты есебінен әртүрлі санаттағы балаларға материалдық көмек көрсету бойынша жұмыс жалғасуда. Биыл бұл мемлекеттік қызметке айналды, табысы ең төменгі күнкөріс деңгейінен төмен отбасылардағы АӘК алатын балаларға, жетім балаларға және ата-анасының қамқорлығынсыз қалған балаларға көмек көрсетіледі. Сонымен қатар, мектептердің қамқоршылық кеңесінің шешімі бойынша өмірлік қиын жағдайға тап болған балалар көмек ала алады. Бір балаға 43 407 теңге көлеміндегі қаражат мектеп формасын, аяқ киім мен кеңсе тауарларын сатып алу үшін ата-аналардың карточкалық шотына аударылады, – деді Бақтығүл Әдекенова.
Жалпыға бірдей білім беру қорынан материалдық көмек алу үшін мектептің кеңсесіне өтініш беріп, отбасының немесе баланың әлеуметтік жағдайы туралы растайтын құжаттарды ұсыну қажет.
Биыл облыста 172 мыңға жуық оқушы мектепке барады. Бірінші сыныпқа 15 485 бала өтініш берді.