Қарағандылық оқушылар халықаралық және республикалық олимпиадаларда табысты өнер көрсетті. Олар қоржындарына күміс және қола наградалар жинады.
«Мұрагер» мамандандырылған мектеп-интернатының 11 сынып оқушысы Бейбарыс Жеңісбек екі халықаралық – Азия-Тынық мұхиты және «Жібек жолы» математикалық олимпиадаларының жүлдегері атанды.
«Жібек жолы» XXIV Халықаралық математикадан олимпиадаға Қазақстан, Өзбекстан, Қырғызстан, Түрікменстан, Түркия, Әзірбайжан, Қытай және Ұлы Жібек жолы бойында орналасқан басқа да елдер қатысты.
XXXVII Азия-Тынық мұхиты математикалық олимпиадасы анағұрлым ауқымды сипатқа ие, онда 40-қа жуық елдің нақты ғылым әуесқойлары сайысқа түседі. Қазақстан атынан ғылым ханшайымы – математика пәнінен республикалық олимпиаданың облыстық кезеңдерінің 130-дан астам жеңімпазы мен жүлдегерлері қатысты.
Зияткерлік жарысқа қатысушылардың пікірінше, тапсырмалар бойынша екі олимпиада да ұқсас. Тапсырмалар саны мен оларды шешуге бөлінген уақытта ғана айырмашылық бар.
– Екі олимпиаданың ішінде мен үшін Азия-Тынық мұхиты олимпиадасы қиынырақ болды. Біріншіден, тапсырмаларды шешуге аз уақыт беріледі, бірақ бес тапсырма бар, ал «Жібек жолында» төртеу. Сонымен қатар, екінші тапсырманы шешу оңай болмады және оны егжей-тегжейлі жазу қажет болды. Соңғы 10 минут қалғанда мен оны шештім, – деп бөлісті Бейбарыс Жеңісбек. – Ал Жібек жолында тапсырмаларды ресімдеуге тым көп уақыт жұмсадым. Екі сағатқа жуық уақыт кетті.
Олимпиада қорытындысы бойынша Бейбарыс облыстың қоржынын екі қола медальмен толықтырды. Ол КАIST (Кореядағы беделді жоғары оқу орны) computer science мамандығына түсу арқылы өзінің білімі мен математикалық дағдыларын одан әрі дамытуды жоспарлап отыр.
«Жібек жолы» математикалық олимпиадасында тағы бір ІІІ орынды «№1 «БІЛІМ-ИННОВАЦИЯ» лицей-интернаты» КММ 10 сынып оқушысы Жанарыс Теңдіков иеленді.
Сонымен қатар, Қарағанды облысының оқушылары Ақтауда өткен жалпы білім беру пәндері бойынша республикалық олимпиаданың төртінші кезеңінде үш күміс және бір қола медаль жеңіп алды.
Н.Нұрмақов атындағы мамандандырылған мектеп-лицейдің 11 сынып оқушысы Әлішер Қазтаев информатикадан ІІ орынға ие болды.
– Олимпиадада бізге алты тапсырма бойынша екі турдан өтуге тура келді. Менің ойымша, міндеттер орташа деңгейде болды. Тақырыбы – спорттық бағдарламалау. Егер бірінші турдан оңай өтсем, екіншісінде аздаған қиындықтар болды, – деді Әлішер Қазтаев.
Ол информатикадан түрлі республикалық және халықаралық жарыстың бірнеше мәрте қатысушысы. Оның қоржынында сондай-ақ Жәутіков және Еуразия олимпиадаларының күмісі мен информатикадан республикалық олимпиаданың алтыны бар.
Сондай-ақ, №1 «БІЛІМ-ИННОВАЦИЯ» лицей-интернатының 11 сынып оқушысы Санжар Қалиақбар мен Саян Мәжит химиядан күміс, ал осы лицейдің 11 сынып оқушысы Айдар Дәрібай қола жүлдеге ие болды.