Қарағанды облысында 2025 жылғы су тасқыны кезеңіне дайындық ретінде өзен арналарын санациялауға, елді мекендерде қорғаныс біліктерін орнатуға және нығайтуға, автожолдардағы құбырлардың су өткізу қабілетін арттыруға бағытталған 160-тан астам іс-шара жоспарланған.
Бүгінгі таңда өңірде инженерлік жұмыстар жоспары әзірленуде. Арықтар қалпына келтіріліп, тазартылады, нөсер кәрізінің коллекторлық-дренаждық жүйелері кеңейтіледі.
Өңірлік коммуникациялар қызметінің платформасында өтетін брифингте алдағы жұмыс туралы Қарағанды облысы ТЖД бастығы Мұрат Қатпанов айтып берді.
– Су тасқыны кезеңінде облыс аумағында болған барлық жағдайларды ескере отырып, қалалар мен аудандар әкімдіктерінің, мүдделі мемлекеттік органдар мен ұйымдардың Жол картасына және облыстық инженерлік жұмыстар жоспарына ұсыныстарын қалыптастыру басталды, – дейді Мұрат Қатпанов. – Ақтоғай ауылының маңында ұзындығы 4,4 км және Нұра – Жаңаталап ауылындағы жаңа көпірден Волховский ауылы ауданындағы өзеннің сағасына дейін ұзындығы 9 км болатын Тоқырауын өзенінің арналарын санациялау бойынша жобалау-сметалық құжаттама әзірленетін болады.
Сондай-ақ облыстық маңызы бар Қарағанды – Саран – Шахтинск автомобиль жолындағы Шерубай – Нұра өзені арқылы өтетін көпірді және облыстық маңызы бар Осакаровка – Литвиновское – Тельман – Молодежный автомобиль жолындағы Есіл өзені арқылы өтетін көпірді қайта жаңарту қажет. Таңатбай су қоймасы да күрделі жөндеуді қажет етеді.
Осы іс-шаралардың барлығын іске асыру облыстың 50-ден астам елді мекенін су басу қаупін барынша азайтуға мүмкіндік береді, деп атап өтті спикер.