Қарағандының ЖЭО-1 және ЖЭО-3-те келесі жылыту маусымына дайындық туралы шешім қабылданды. Жөндеу бағдарламасы сәуір айында басталады, деп хабарлады «Қарағанды Энергоцентр» ЖШС баспасөз қызметі.
«Атом және энергетикалық қадағалау және бақылау комитетінің Қарағанды облысы бойынша аумақтық департаменті «Қарағанды Энергоцентр» ЖШС-нің 2024 жылға арналған жөндеу бағдарламасының көлемін қарады. Жұмыстар 6 айға – сәуірден қыркүйекке дейін есептелген. ЖЭО-1 және ЖЭО-3 жөндеу бағдарламасына салынған қаражат 18,2 млрд теңгені құрайды. Қаражат жабдықтың сенімділігін сақтауға, тұрақтылықты арттыруға және қуат шектеулерін алып тастауға бағытталады», – делінген компания хабарламасында.
ЖЭО-3-те жұмыс 1 сәуірде басталады. Мұнда екі қазандық агрегаты мен бір турбинаны күрделі жөндеу жоспарланған. Алты қазандық пен бес турбинада ағымдағы жөндеу жұмыстары жүргізіледі.
Жазда жұмыс істемейтін ЖЭО-1-де жөндеу жұмыстары қалада жылыту маусымы аяқталғаннан кейін басталады. Барлық сегіз қазандық агрегаты мен төрт турбинаны жөндеу қарастырылған. Оның ішінде екі қазандық пен бір турбинаға күрделі жөндеу жүргізіледі. Өз ресурсына қызмет еткен жабдық жаңартылатыны атап өтілді.
Сонымен қатар, қосалқы жабдықты жөндеу қарастырылған. Мысалы, ЖЭО-3-те кірме теміржол жолы мен бағыттамалық бұрмаларды күрделі жөндеу жоспарланған. ЖЭО-1-де қазандық-су жылыту және турбина цехтарының жабдықтары жаңартылады.
Сондай-ақ, компания бірқатар ірі инвестициялық жобаны жалғастырады: қоршаған ортаға эмиссияларды мониторингілеудің автоматтандырылған жүйесін орнату, №3 күл үйіндісінің бірінші тостағанын салу, үшінші жылу шығару құрылысы шеңберінде құбырларды қайта жаңарту.