2025 жылғы 28 шілдеге қараған түні Қарағанды қаласындағы ірі сауда орталықтарының бірінде өрт оқиғасы тіркелді. Алдын ала мәліметтер бойынша, City mall сауда үйінде пайда болған өрт, бірнеше сағат ішінде қызыл жалын ғимараттың бір бөлігінде шарпыған. Өрт сөндірушілердің жедел әрі үйлесімді әрекетінің арқасында өрт түнгі уақытта локализацияланып, одан әрі таралуына жол берілмеді.
Өрт сөндіру жұмыстарына Төтенше жағдайлар департаментінің бірнеше техникасы мен арнайы бөлімшелері жұмылдырылды. Олар оқиғаның алғашқы минуттарынан бастап отты ауыздықтауға кірісті. Абырой болғанда, зардап шеккендер туралы мәлімет түскен жоқ, өрт кезінде ғимарат ішінде адамдар болмаған.
Жергілікті билік қауіпсіздік шараларын күшейту мақсатында оқиға орнына ҚР Ұлттық ұланының 5451 әскери бөлімінің 50 сарбазын қызметке шықты. Сарбаздар түнгі уақыттан бастап сауда орталығының айналасын қоршауға алды. Олар қазіргі уақытта оқиға орнында екі ауысыммен қызмет атқарып жатыр. Әскери қызметшілердің басты міндеті — тәртіпті қадағалап, бөгде адамдардың және көліктердің қауіпті аймаққа өтуіне жол бермеу.
Өрттің нақты шығу себебі мен келтірілген материалдық шығын мөлшері әлі анықталып жатыр. Қаланың Төтенше жағдайлар қызметі, полиция және техникалық бақылау органдары оқиғаға қатысты тергеу жұмыстарын жалғастыруда.
Қоғамдық тәртіп пен қауіпсіздікті қамтамасыз етуде әскери қызметшілердің қосқан үлесі ерекше атап өтілуде. Олар жағдай толық тұрақталғанға дейін өз міндеттерін жалғастыра береді.
ҚР ІІМ ҰҰ «Орталық» ӨңҚ Баспасөз қызметі