Осакаров ауданында биыл Молодежный кентінде блок-модульдік қазандық және Сарыөзек, Ошаған, Ақпан, Жұлдыз және Шұңқыркөл ауылдарында бес медициналық мекеме құрылысы басталады. «Ауыл – Ел бесігі» арнайы жобасы бойынша Батпақ және Озерное ауылдарының ішкі жолдары жөнделеді.
Сондай-ақ, ауданда Николаевка, Сенокосное, Садовое, Трудовое ауылдарында су құбыры желілерінің құрылысы аяқталады. Осакаровкадағы су құбырының жетінші кезегінің құрылысы жалғасады.
Өңірлік коммуникациялар қызметі платформасында өткен брифингте ауданның әлеуметтік-экономикалық дамуы туралы әкім Руслан Нұрмұханбетов айтып берді.
– Халықты ауыз сумен қамтамасыз ету – аудандағы басым бағыттардың бірі. «Ауыл – Ел бесігі» арнайы жобасы бойынша Қаракөл ауылында су құбыры желілерінің құрылысы басталады. Конкурстық рәсімдер басталды, – деді Руслан Нұрмұханбетов. – Тағы бір маңызды міндет – Молодёжный кентінде блоктық-модульдік қазандық салу және үш көшеде оқшаулаумен жылу желілерін жөндеу. Осакаровка кентінің қазандығында екі қосымша қазандық орнатылады.
Тұрғын үй салу – тағы бір маңызды міндет. Осакаровкада биыл төрт 18 пәтерлі жалға берілетін үйді пайдалануға беру жоспарлануда.
– Осы жоспарлармен қатар «Ауыл – Ел бесігі» бойынша біз Батпақ және Озерное ауылдарындағы кентішілік жолдарды жөндеп, бес елді мекенде су құбырларын салмақшымыз. Сонымен қатар, Осакаровканы газбен қамтамасыз ету басталады. Бізде жоба бар, қаржыландыруды күтеміз, – деп атап өтті әкім.