Қарағанды облысында шегірткелердің қаптап кету қаупі болжанбайды, жағдай тұрақты. Дегенмен, алдын алу шаралары қабылдануда. Зиянкестерге қарсы егістіктерді уақтылы химиялық өңдеу маңызды. Бұл жұмыстар ретімен жүргізілуде.
Өңірдегі ахуалды бақылау және мониторингілеу үшін облыс әкімінің орынбасары Бауыржан Асанов басқаратын жедел штаб жұмыс істеп жатыр.
Бұқар Жырау ауданында штабтың көшпелі отырысы өтті. Жағдай мен қабылданған шаралар туралы ведомстволардың басшылары баяндады. Шегірткелер мен басқа да өсімдік зиянкестерін анықтауға тексеру жүргізіледі. Сондай-ақ өңдеуге қатысатын техника көрсетілді.
— Биыл шегіртке зиянкестеріне қарсы өңдеу алаңы ұлғайтылды. Жоспарланған 112 мың гектардың шамамен 30 мың гектарын авиация мемлекет қаражаты есебінен, қалған 82 мың гектарын ауыл шаруашылығы құрылымдарының өз қаражатына әуе және жер үсті тәсілімен өңдейтін болады. Жұмыстар жеті ауданда басталып, жүргізілетін болады, — деді Ауыл шаруашылығы басқармасының басшысы Саят Мусин.
Жеңіл авиация және жер үсті бүріккіштері жұмылдырылады.
Басқарма басшысының айтуынша, жұмыстарды жүргізу үшін барлық қажетті заттар, оның ішінде пестицидтер қоры қамтамасыз етілген.
Сондай-ақ, ҚР Ауыл шаруашылығы министрлігі АӨК мемлекеттік инспекция комитетінің облыстық бөлімшесінің басшысы Жасұлан Ешмұханов атқарылып жатқан жұмыстар мен жоспарлар туралы есеп берді.
— Уақытты өткізіп алмау керек. Фитосанитарлық қауіпсіздік — өте маңызды мәселе. Алдын алу шараларын уақтылы қабылдау, жұмыстың сапасын бақылау қажет. Жағдайды бақылау, мониторинг тұрақты негізде жалғасады, — деп атап өтті Бауыржан Асанов.