Қарағанды облысы Абай ауданында «Taza Қазақстан» республикалық акциясы мен «Таза бейсенбі» бастамасы аясында экологиялық тазалау жұмыстары ұйымдастырылды. Іс-шара п. Топар ауылының су қоймасы жағалауында және қоғамдық жағажай аумағында өтті. Бұл аймақ жаз мезгілінде демалушылар көп жиналатын танымал орындардың бірі болып саналады.
Экологиялық шараның негізгі мақсаты – п. Топардағы қоғамдық жағажайды тұрмыстық қалдықтардан тазарту және табиғатқа ұқыпты көзқарас қалыптастыру болды. Қатысушылар пластик қалдықтар, шыны бөтелкелер, орау материалдары мен басқа да қоқыстарды жинады.
Іс-шараға 50-ден астам адам қатысты. Олардың қатарында «Жастар рухы» жастар қанатының өкілдері, аудан мекемелерінің қызметкерлері және «AMANAT» партиясының 30 белсенді мүшесі болды.
— Бұл бастама өңірдің экологиялық жағдайын жақсартуға, тазалық мәдениетін және қоршаған ортаға жауапкершілікпен қарау дағдыларын қалыптастыруға бағытталған, — деді «AMANAT» партиясы Абай аудандық филиалының төрағасы Бауржан Төлегенов.
Партия белсендісі Т.Какенов та өз пікірін білдірді:
— Біз тек қоқыс жинап қана қоймаймыз, үлгі көрсетеміз. Экология – әрбір азаматтың жеке жауапкершілік аймағы. Табиғатты болашақ ұрпақ үшін сақтау – бәріміздің ортақ міндетіміз.
Аудандық мәслихат депутаты Бахытжан Шәріпұлы Агзамов та мұндай шаралардың маңыздылығын атап өтті:
— «Taza Қазақстан» – бір реттік акция емес, бұл – экологиялық сананы қалыптастыру жолы. Мұндай бастамалар адамдардың туған өлкеге деген жанашырлығын оятады. Мұндай акциялар тұрақты түрде өткізіліп тұруы керек және оған көбірек адам қатысқаны маңызды.
Қарағанды облысындағы «AMANAT» партиясы экологиялық бастамаларды белсенді түрде қолдай отырып, өңір тұрғындарын осындай шараларға қатысуға және табиғатты қорғауға шақырады.